Terma jamomizning sobiq futbolchisi Ulug'bek Ro'zimov esa quyidagi fikrda.

- Iordaniyaga qarshi kechgan bahsni uyda, TV orqali ko'rdim. To'g'ri, stadionga borib kuzatsam ham bo'lardi. Ammo uyda xotirjam takror namoyishlari bilan ko'rganga nima etsin. Ochig'ini aytganda, shu kuni har ikkala jamoaning ham o'yinidan ko'nglim to'lmadi. Bunday o'yin bilan JCHga borish uchun kurashyotgan jamoalarning namoyish etgan o'yinidan so'ng, ularning nufuzli musobaqaga borishini kutish ham qiyin masala edi.

- Balki yigitlar murabbiylar ko'rsatmasini to'liq bajara olmagandir. Bilasizmi, Iordaniya bilan safardagi birinchi o'yinda durang qayd etib kelganimizdan so'ng, ularni o'z maydonimizda hotirjam o'ynab yutishimiz kerak edi. Biroq futbolchilarimiz birinchi bo'lib hisobni ochganidan so'ng, o'z kuchiga ortiqcha ishonib yuborishdi shekilli, o'yinni susaytirib yuborishdi. Ikkinchi bo'limda sermaxsullikni oshirish uchun boshqa taktikalarda ham o'ynab ko'rish kerak edi, menimcha.

- Shuningdek terma jamoamizning asosiy kamchiligi deb, standart vaziyatlardan unumli foydalana olmaganini aytish mumkin. Futbolda o'yinda sodir bo'lgan 10ta standart vaziyatdan kamida 1tasidan aniq foydalana bilish juda muhim. Buni birinchi taymda yigitlarimiz qaysidir manoda uddaladi. Lekin uchrashuvning ikkinchi qismida, jarima yoki burchak to'plari ko'kka sovurildi.

- Hujumchilar haqida gapiradigan bo'lsam, o'yinni o'z qo'liga olib, raqib jarima maydoni ichida o'zi uchun qulay vaziyat yaratadigan hujumchini ko'rmayapman. Yoki oldingi chiziq egalarini qulay paslar bilan taminlovchi futbolchi etishmadi. Shuning uchun ham aytarli golga tortadigan xavfli vaziyatlarni ko'rmadik.

- Iordaniyani JCH yo'llanmasini qo'lga kiritish imkoniyati juda past deb bilaman. Bu o'yini bilan KONMEBOL vakilidan o'ta olishi amrimaxol. Bu borada ularning imkoniyat deyarli nol desam ham yanglishmagan bo'laman.

Jahongir Mirzo yozib oldi.

Ulug'bek Ro'zimov: "Standart vaziyatlardan foydalanishimiz kerak edi"