Albatta bunda murabbiylar shtabining mehnati katta. Biroq futbolchilarning bu darajagacha etib kelishida ularni bolaligidan millionlar o'yini sir asrorlarini o'rgatgan ilk murabbiylarining hissasi beqiyos. Bugungi kunda terma jamoa azolari Umarali Rahmonaliev, Abduqodir Husanov, Mahmud Mahamadjonov, Shahzod Nematjonov, Po'latxo'ja Xoldorxonovlarni "Bunyodkor" akademiyasidagi murabbiyi Alisher Ibrohimov hisoblanadi. Yaqinda bolalar futbolida ulkan tajribaga ega mutaxassis bilan suhbatlashish, fikrlarini tinglash istagi tug'ildi.

- 2003 yilda tug'ilgan yuqorida siz aytgan bolalarni 2013 yil qabul qilib olganman. Eslasangiz avvallari A va B guruhlari bo'lardi. B guruhga meni murabbiy sifatida tayinlashdi. Munosiblarni olib qoldim. Qolganlarni esa viloyatlardan qidirishni boshladim. Turnirlarni kuzatdim. U vaqtda "Spartak", "Paxtakor", "Bunyodkor" bir-biriga raqobatchi, hozirgidek "Odil Ahmedov FA" va boshqa shunga o'xshash jamoalar deyarli yo'q edi hisob. Mana endi raqobat oshmoqda. Maqsad chempion bo'lish emas, bolalarni topib tarbiyalash . Namanganga shunday turnirlardan biriga borib Umarali Rahmonalievni topdim. 9 yoki 10 yosh paytlar edi. Turnir tugagach uni o'yinini ko'rish uchun Namanganga yana 2,3 marotaba borishimga to'g'ri keldi. Oxiri baribir olib keldik. Bu pallada Po'latxo'ja Xoldorxonov, Mahmud Mahamadjonov, Abduqodir Husanov jamoada edi. Keyinchalik Umid Sultonov, Shahzod Nematjonov, Humoyunshoh Sayyotov qo'shilishdi. Mahmud avval himoyachi bo'lmagan, aqlli o'ynashini hisobga olib o'rtaga qo'yardim. Keyinchalik poziciyasi o'zgarib ketdi.

- Umaralidan futbolchi chiqishini hech kim kutmagan. Bo'yi past, jismonan baquvvat emasdi. Salohiyatini ko'rib nimadir borligini ko'rdim. Ko'zimiz etgan. Bo'lmasa olib kelmasdik. 2 yil davomida ishladik. Keyin u A guruhga o'tdi. B guruh bilan ko'plab musobaqalarda g'olib chiqdik, chempionatda ham peshqadam bo'lganmiz. Ishlarimiz yaxshi ketayotgan pallada meni A guruhga o'tkazishdi. Xudoga shukur qilaman, ko'pchiligi yuzimizni yorug' qildi. Umaralini shu darajaga kelishida onasi ham elkama-elka turdi, deb o'ylayman. Chunki akademiya yotoqxonaga 12 yoshdan qo'yardi. Onasi bilan kvartira olib, navbatlarda turib uydan qatnagan. Juda mehnatkash futbolchi. Har bir o'yindan oldin duo olib tushadi. 2003 yillar o'zi omadli jamoa chiqib qoldi, deyarli barchasi o'ynab ketdi. Poydevorni yaxshi qo'ysangiz keyingisi ham to'g'ri bo'ladi. Mehnatlarimiz samara berayotganidan xursandman. Omadini bersin.

- Osiyo chempionligiga kelsak, Ravshan aka Haydarov kuchli mutaxassis ekanligini yana bir bor ko'rsatdi. Ularga faqat havas qilamiz. Terma jamoa o'yindan o'yinga kuchayib bordi. Boz ustiga, stadiondagi atmosfera ham yordam berib yubordi, deb o'ylayman. Bu bosimni ko'taradigani bor, sinib qoladigani bor. Bundan olib chiqib ketish murabbiyning mahorati. Ravshan aka hali Jahon chempionatiga ham yigitlarni munosib tayyorlaydilar.

- O'zbekiston yoshlari musobaqada kuchli terma jamoalardan ustun kelishdi. Men nafaqat bu yosh, balki qolgan yosh toifasidagi jamoalarda ham Avstraliya, Koreya, Saudiya Arabistonidan qo'rqish degan narsani ko'rmayapman. O'zlariga ishonchi katta. Bemalol o'ynaydigan payt ham keldi-da! Ulardan ustun bo'lsak, bo'lyapmizki, kam joyimiz yo'q. Xudo xohlasa hammasi oldinda.

- Finalda hal qiluvchi pallada penalti tepilayotgan vaziyatga qaramadim. Baribir shu vatan uchun achinasiz, hayajon bo'lishi tabiiy hol. 11 metrda barchasi ishonchga bog'liq. Umaralida shu narsa bolaligidan shakllangan. Bu hammamizning yutug'imiz. Tashqaridan qaraganda osondek. Ammo bir narsaga erishish uchun qancha asab, qancha stresslarni boshdan kechiramiz. Chetdan turib bolalar futboli-ku, deb qo'yishadi. Hamma ham ishlaydi, lekin qanday ishlashni bilmaydi. Bola qo'l ostingizga kelganida bamisoli hali "loy" bo'ladi, uni yillar davomida shakllantirib sanat asari darajasigacha chiqarishingiz kerak. Qiyinchiliklari ko'p. Katta jamoalarga borganda ustoziga lanat emas, rahmat olib kelsin. Hozirgi 2009 yillar jamoamda ham salohiyatli kelajagi bor bolalar ko'p. Nasib qilsa, 2 yildan keyin ko'zga ko'rina boshlashadi.

"Umaralidan futbolchi chiqishiga hech kim ishonmagan edi" - Osiyo chempionlarini tarbiyalagan murabbiy Alisher Ibrohimov bilan intervyu