Xususan turning markaziy o'yini deya qaralayotgan “Nasaf” – “Paxtakor” bahsi ko'pchilikda katta qiziqish uyg'otmoqda. Chempionlik masalasini hal etadigan o'yin oldidan tajribali sobiq futbolchi Umid Isoqovning fikrlarini bilishga urindik. Ishqibozlar yaxshi bilishsa kerak, Isoqov o'z vaqtida “Paxtakor” va “Nasaf” tarkibida to'p tepgan.

“NASAF” – “PAXTAKOR” O'YINI HAQIDA
- Shubhasiz turning markaziy o'yinidir. Finalga teng bahs ham deyish mumkin. Qarshiliklarning o'yinini kuzatdim. Yigitlar yomon xarakat qilmayapti. “Paxtakor” haqida ham fikrlarim ijobiy. Tarkib yoshlardan tashkil topgan bo'lsada, kurashishmoqda. Menimcha bugun Qarshidagi bahsda “ajdarlar” jiddiy tashvish tug'diradi deb o'ylayman. To'g'ri, ular O'zbekiston Kubogini yutdi va chempionatda 3-o'rinni rasmiylashtirib bo'ldi. Ammo shunga qaramay “sherlar”ga bahsda astoydil o'ynaydi. Muxlislarning qo'llab-quvvatlashi ham ularga juda qo'l kelishi turgan gap. Bugun stadion tribunasi to'lishi mumkin. Ajoyib muhit xosil bo'ladi. Menimcha “Nasaf” kamida durang qayd etadi.

CHEMPIONLIK TO'G'RISIDA
- “Lokomotiv” bugun hotirjamlik bilan “Mashal”ni mag'lub eta oladi deb o'ylayman. Chempionlikka yaqin turgan bir paytda bu kabi o'rtamiyona jamoalarga qarshi ochko yo'qotmaslikka urinadi. Bu borada “temiryo'lchilar”ning imkoniyati yuqori. Agarda bugun “Paxtakor” Qarshida ochko yo'qotsa nazarimda “Lokomotiv” keyingi turda ham Namangandan g'alaba bilan qaytishga xarakat qiladi. Chunki “Paxtakor” kelasi turda o'z uyida “Andijon”ni mag'lub etishi haqiqatga yaqinroq deyish mumkin. Chempionlik kimga nasib qilishi to'g'risida hozircha tayinli fikr bildirish qiyinroq. Ko'p narsa ushbu turda aniq bo'ladi.

AUTSAYDERLAR XUSUSIDA
- Autsayderlar o'rtasidagi kurash ham avj olmoqda. Menimcha “Buxoro”ning imkoniyati pastroq. Ularga juda qiyin bo'ladi. “So'g'diyona” ertaga “Qo'qon-1912” mehmoni bo'ladi. Qo'qonliklar o'z oldilariga qo'yilgan vazifani bajarib bo'ldi. Balki endi jizzaxliklar g'alaba qozonar. Menimcha 16-o'rin egasi so'nggi turda aniq bo'lsa kerak. Yuqorida aytib o'tganimdek, ko'p narsa 29-turda oydinlashadi.

Islombek Rustambekov.

Umid Isoqov: “Katta ehtimol bilan “Nasaf” bugun yutqazmaydi”