Виктор Кумиков шогирдлари сўнгги дақиқаларда гол уриб, мағлубиятдан қутулиб қолди. Учрашув якунлангач, меҳмонлар етакчи футболчиси Усмонали Исмоналиев билан суҳбатлашдик.

- “Локомотив”га қарши ўйиндан олган таассуротларингиз қандай?
- Қизиқарли ўйин бўлди. Биз сўнгги дақиқаларга қадар курашдик. Бу ўйинда очко ишлаб олишимиз муҳим эди. “Локомотив” ўз майдонида тўп тепаётггани сабабли очко олиш ҳам фойдали ҳисобланарди. Лекин биз майдонда ғалаба учун чиқдик. Яратилган имкониятларимиздан фойдалана олмадик. Очко олишимиз ва уйга муваффақият билан қайтишга бўлган иштиёқ юқори эди. Йигитларга ҳам миннатдорчилик билдирамиз. Улар тиришқоқлик билан охирги сонияларга қадар курашдик ва таслим бўлмадик. Умуман олганда, қайд этилган натижадан хурсандмиз.

- Нима деб ўйлайсиз, “Андижон” бугун мавсумдаги энг яхши ўйинини ўтказдими?
- Йўқ. Мен бундай деб ўйламайман. Чунки “Локомотив”га қарши баҳснинг биринчи бўлимида ўзимиз истаган даражада ҳаракат қилмадик. Танаффусдан сўнг ўз даражамизда ўйнадик. Ўйлашимча, мавсумдаги энг яхши ўйинларимиз олдинда деб ўйлайман.

- “Андижон”нинг Суперлигада қолиш имкониятини қандай баҳолайсиз?
- Ишонаманки, биз Суперлигада қолиш вазифасини уддалаймиз. Раҳбарият бизни қўллаб-қувватламоқда. Қолган ўйинларимизда ижобий натижа кўрсатиб, керакли миқдордаги очколарни қўлга киритамиз деган умиддаман. Кейинги турдаги рақибларимиз ким бўлишидан қатъий назар, ғалаба учун майдонга чиқамиз. Мухлисларимизни хурсанд қилиш истагидамиз.

Усмонали Исмоналиев “Локомотив” билан ўйин, Суперлигада қолиш имконияти борасида нималар деди?