Bahsdan oldin Andrey Shipilov shogirdlarining imkoniyatlari yuqori chamalangan edi. Amalda ham shunday bo'lib chiqdi. O'z uyida mag'lubiyat alamini totib ko'rgan "Andijon" futbolchilariga yangi murabbiy Viktor Kumikovning falsafasini tushunib olishi uchun malum bir vaqt kerak. Buni kechagi o'yin haqida fikrlarini bildirgan futbolchi Usmonali Ismonaliev ham tasdiqlagan holda bahs borasidagi taassurotlari bilan o'rtoqlashdi.

"Raqibimiz "Metallurg" sovrinli o'rinlar uchun kurashayotgan yaxshi saviyadagi jamoa hisoblanadi. Ular o'tgan turda safarda "Lokomotiv"ni yirik hisobda mag'lubiyatga uchratgan edi. Shu bois biz bilan uchrashuvga ko'tarinki kayfiyatda etib kelishdi. Ularning tarkibidagi futbolchilarning sport formasi yaxshi ekanligi ko'rinib turibdi. Biz esa yana o'z xatolarimiz evaziga mag'lub bo'ldik. Mag'lubiyatga bahona izlamoqchi emasman. Biz ham g'alaba uchun maydonga tushgandik. Futbolda gohida pasayishlar bo'ladi. Mag'lubiyatlar ketidan esa yorqin g'alabalar keladi. Keyingi o'yinlarda yutishga harakat qilamiz",- deydi Usmonali Ismonaliev.

Usmonali Ismonaliev: "Mag'lubiyatga bahona izlamoqchimasman"