"Dinamo" Joel Kojoni "Istiqlol"ga sotishni istamadi. Futbolchi murabbiy va klub direktorini ayblamoqda

Biz vaziyatga oydinlik kiritish maqsadida Vadim Abramov bilan bog'landik.

- Joel Kojo bilan bog'liq vaziyat haqida so'ramoqchi edik. "Istiqlol" klubi taklif bilan chiqqani rostmi?
- Ha, bitta emas ikkita klub bizga taklif bilan chiqdi.

- Transfer amalga oshmay qolganida futbolchi va uning turmush o'rtog'i sizni va direktorni ayblamoqda...
- Bilasizmi men kimnidir turmush o'rtog'ining fikriga javob berishni istamayman.

- Mayli, transfer nima uchun amalga oshmadi?
- Agar bu taklif O'zbekistondagi transfer oynasi ochiq paytida bo'lganida biz o'ylab ko'rgan bo'lardik. Sababi biz Kojoni sotsak o'rniga boshqa hujumchi olishimiz kerak bo'lardi. Hozir bizda transfer oynasi yopiq. Nima uni qo'yib yuborishimiz kerakmidi? Futbolchining klub bilan 1,5 yillik shartnomasi bor.

- Kojo o'z intervyusida futbol o'ynashga xohishi yo'qligini aytdi. Hujumchi bu ishlardan keyin futbol o'ynamay qo'yishi, gollar urmay qo'yishidan qo'rqmaysizmi?
- Agar shunday qiladigan bo'lsa faqat o'ziga zarar qilgan bo'ladi. Agar futbol o'ynamay qo'ysa bizdan keyin kimga kerak bo'larkin? Aslida u "Dinamo"dagi o'yinlari orqali shu darajaga chiqqanini unutmasligi kerak.

Vadim Abramov Kojo bo'yicha vaziyatga oydinlik kiritdi