Ushbu uchrashuvdan so'ng mehmonlar bosh murabbiyi Viktor Jalilov fikrlarini bildirib o'tdi.

"Bunga qadar ikki jamoa ham dastlabki turlardagi mag'lubiyatdan so'ng yaxshi holatda emasdi. Futbolchilarning imkoniyatlaridan kelib chiqib mag'lubiyatning o'rnini to'ldirishga harakat qildik. Xuddi biz kabi raqib ham g'alaba uchun intildi. Ushbu g'alaba jamoamizga ruhiy ko'tarinkilik berishi tabiiy. O'ylaymanki, bugungi shiddatlarga va kurashlarga boy o'yin muxlislarga manzur keldi. Faqat VAR yoki penaltidan emas o'yindan ham gol ura olishimiz mumkinligi meni xursand qildi. G'alabadan xursandman, yigitlar maydonda borlarini berishdi. O'z maydonimizda "So'g'diyona" bilan kechgan bahsda ham ko'p vaziyatlar yaratgan edik. Lekin foydalanishga kelganda oqsagandik. Bugun esa omad ham kulib boqdi. "Lokomotiv" haqida ijobiy fikr bildirishim mumkin. O'yinni yaxshi yo'lga qo'ya olishgan. Murabbiy imzosi ko'rinib turibdi. Ikkinchi bo'limda o'yinimizni kuchaytirdik. Bu esa o'z so'zini aytdi. Umuman olganda biz g'alaba to'pini urishga yaqin kelayotgandik",- deydi Viktor Jalilov.

- O'zbekiston Superligasidagi uchrashuvlarda qo'llanilayotgan VAR tizimi haqida nima deya olasiz? Bugun ham darvozalarga penaltilar VAR orqali belgilandi...
- Xalqaro o'yinlarda qo'llanilayotgani kabi bizning chempionatimizda ham ushbu tizim ishlamoqda. Bu borada mutaxassislar bor. Deyarli ikki yildan beri qolgan chempionatlarda ham VAR tizimidan foydalanilmoqda. Agar har bir o'yinda yo'lga qo'yilsa hakamlarga qulaylik olib keladi. Hech narsa birdaniga amalga oshmaydi.

O'yin davomida yo'lga qo'yilgan xatolarni tahlil qilamiz. Xotirjam ko'rib chiqamiz. Futbolchilarim ikkinchi bo'limda g'alabani ko'proq istashdi. Bu borada kiyinish xonasida aytib o'tdik, buni ular his qilishdi. Biz g'alaba qozondikmi, demak raqibga qaraganda kamroq xato qilgan bo'lamiz.

Viktor Jalilov: "Faqat penaltidan emas, o'yindan ham gol ura olishimiz mumkinligi meni xursand qildi"