Ички келишувлар

Андре ГОМЕШ, «Валенсия» «Барселона»

35 млн. евро

Валенсиядаги икки йиллик фаолияти давомида ёрқин ўйинлар намойиш этган Андре марказий чизиқ етакчиларидан бири мақомига эга чиқди. Натижада, «Ювентус» ёки «Реал»га кетиши ҳақидаги гап-сўзлар пайдо бўлди. Аммо ярим ҳимоячи «Барса»ни танлади. «Камп Ноу»дагилар Европа чемпионига асосий таркибдан жой ваъда қилишгани йўқ. Бироқ эндигина 23 ёшга чиққан футболчи бироз сабр қилишга ҳам рози. Халқаро мусобақалар туфайли «Барса»нинг жуда кўп учрашувларда майдонга тушишини инобатга олсак, Гомеш ҳам ишсиз қолиб кетмаслигига умид қилиш мумкин.

Кевин ГАМЕЙРО, «Севилья» «Атлетико»

32 млн. евро

Фернандо Торрес учун навқиронликка қайтиш иложсиздек, гарчи у рисоладагидек тўп сураётган бўлсада. Антуан Гризманн хусусида ҳеч қандай гап-сўзга ўрин йўқ. Диего Симеоне жамоасига яна бир ҳужумчи зарур. Мураббийда Борха Бастонни олиб қолиш ва Диего Костани Мадридга қайтариш вариантлари ҳам мавжуд эди. Лекин «Севилья»нинг тезкор тўпурари энг мақбул ечим эканига шубҳа йўқ. Қолаверса, бу икки француз бир-бирини яхши тушунади.

Пако АЛЬКАСЕР, «Валенсия» «Барселона» 30 млн. евро

Машҳур MSN учлиги учун муносиб ўринбосар лозимлиги ҳақида жуда кўп гапирилди. Сандро ва Мунир номзодларининг ушбу вазифага лойиқ эмасликлари ҳам таъкидланди. Боз устига, бу йигитлар янги жамоаларга мослашиш билан бандлар. Алькасердан жудо бўлиш «Валенсия» мухлислари учун жуда оғир кечди. Клуб мутасаддилари бошқача фикрда эдилар. Нима бўлганда ҳам, «Барса» ажойиб ҳужумчига эга чиқди, «Валенсия» эса яна битта жиддий муаммони ҳал қилишга мажбур. Дарвоқе, Мунир ал Ҳаддоди айнан шу мақсадда ижарага олинган бўлса, ажабмас.

Альфред Н~ДИАЙЕ, «Бетис» «Вильярреал»

8 млн. евро

Томас Пина «Брюгге» таклифини қабул қилгач, «Вильярреал» унга ўринбосар излашга мажбур бўлди. «Ғаввослар» бахтига бу ниятни амалга ошриш учун кўп вақт кетмади - «Бетис»нинг таянч ярим ҳимоячиси Альфред таклифни қабул қилди. Сенегаллик (Франция ёшлар терма жамоаси шарафини ҳимоя қилган) футболчи зарур пайтларда марказий ҳимоячи вазифасини бемалол уддалай олади. Демак, у «МЮ»га ўтиб кетган Эрик Байи ўрнини ҳам тўлдириши мумкин.

Денис ЧЕРИШЕВ, «Реал» «Вильярреал»

7 млн. евро

Денис ниҳоят, «Қироллик клуби»даги «тутқунлик»дан халос бўлди. Адолат юзасидан таъкидлаш жоизки, «Реал» ўз тарбияланувчисининг фаолиятини барбод қилиш ниятида эмасди. Аммо Черри «Вильярреал» билан шартнома имзолашга қарор қилди. «Ғаввослар» жамоаси Денисга яхши таниш - ижара асосидаги ўйинлари орқали мухлислар меҳрини қозониб улгурган. Энди муҳими - жароҳатлардан эҳтиёт бўлган ҳолда янада самаралироқ тўп суриш.

Хорижий харидлар

Альваро МОРАТА, «Ювентус» «Реал»

30 млн. евро

Мадрид суперклубининг фаолиятига диққат билан эътибор берсангиз, айрим тарбияланувчилар бошқа жамоага ўтиб, ЕЧЛда ўз жамоаларини 2-3та гол билан «сийламагунларича» Флорентино Переснинг уларга нисбатан лоқайдлиги давом этаверадигандек туюлади. Масалан, Фернандо Морьентес «Монако»га ижарага бериб юборилганидан кейин, Альваро Мората эса «Ювентус» аъзосига айланганидан сўнг нималарга қодир эканликларини мадридликларга кўрсатиб қўйишди. Шунда ҳам «Қироллик клуби» уларга нисбатан эҳтиёткорлик билан ёндашди ва Моратанинг шартномасига қайтадан харид қилиш бандини қўшиб қўйди. Икки йилдан кейин ана шу ҳуқуқдан файдаланди. Шу тариқа Роберт Левандовскининг Мадридга келиши ҳақидаги гап-сўзлар миш-мишлигича қолиб кетди. Ҳозирда олдинги чизиқда Альваро Мората фақат Карим Бензема билан рақобатлашади.

Самюэль ЮМТИТИ, «Лион» «Барселона»

25 млн. евро

Пике-Маскерано дуэти ҳозирда барча рақиблар кўнглига даҳшат солаётгани бор гап. Агар улардан бири сафдан чиққудек бўлса, Луис Энрике мушкул вазиятга тушиб қолади. Шундай экан, жуфтликка муносиб ворис топиш - ақлли қарор. Юмтити «Лион»да етакчилар сафида эди, Еврода ҳам ажойиб ўйин кўрсатди. Демак, унинг салоҳияти шубҳадан холи.

Николас ГАЙТАН, «Бенфика» «Атлетико»

25 млн. евро

Диего Симеоне аввалгидек қатъият билан бўлмасада, барибир, таркибни янгилашни давом эттирмоқда. «Бенфика» ҳужумчиларининг асосий ижодкори бўлган Гайтан энди «Атлетико»нинг олдинги чизиғида ўзгача мазмун кашф этади. Энг муҳими, 28 ёшли сермаҳсул ҳужумчи учун бор-йўғи 25 млн. евро сарфланди - айрим фантастик келишувлар олдида бу шунчаки совғадек туюлади.

Эсекьел ГАРАЙ, «Зенит» «Валенсия»

20 млн. евро

Трансфер мавсумида албатта, юз бериши кутилган келишув амалга ошди. Аргентиналик марказий ярим ҳимоячига «Челси» билан «Валенсия» харидор эди. Футболчи серёмғир Лондондан илиқ денгиз соҳилини афзал билди. Тахминларга кўра, Гарай «Ман Сити»дан ижарага олинган Эльяким Мангалья билан жуфтликда тўп суради.

Люка ДИНЬ, «ПСЖ» «Барселона»

16,5 млн. евро

«Барселона»да Хорди Альбадек баҳодир билан рақобатлашишга тўғри келишини Динь яхши тушуниб турибди. 22 ёшли француз асосан Испания кубоги беллашувлари, шунингдек, нисбатан савияси пастроқ жамоаларга қарши учрашувларга умид қилиши мумкин.

Шиме ВРСАЛЬКО, «Сассуоло» «Атлетико» 16 млн. евро

Ёши 31га чиққанига қарамай, ишончли тўп сураётган Хуанфран терма жамоа эътиборидан ҳам четда қолмаяпти. Бироқ 24 ёшли хорватиялик ўйинчи жамоага Симеоне даврида ҳам, ундан кейин ҳам хотиржамлик бахш этади. Келажакка мўлжалланган ажойиб харид!

Франко ВАСКЕС, «Палермо» «Севилья»

15 млн. евро

Италияда танилиб улгурмаган универсал. Унинг «Палермо»си сал бўлмаса «В» серияга тушиб кетиши мумкин эди. Бу омадсизлик аргентиналик ўйинчининг нуфузига путур етказмади. Васкес жамоа голларининг 36 фоизида бевосита иштирок этди. «Севилья»да ҳам у сермаҳсул ўйинлари билан мухлислар кўнглини овлашга интилади - Хорхе Сампаоли кимни таклиф қилишни яхши билади.

Ла-лигани тарк этганлар

Шкодран МУСТАФИ, «Валенсия» «Арсенал»

41 млн. евро

«Валенсия» мустаҳкам ҳимоя чизиғи билан мақтана олмасада, сўнгги икки мавсумда Мустафи-Отаменди тандеми ўта ишончли ҳаракат қилди. Оқибатда Николас «Ман Сити» даражасига кўтарилди. Шундан кейин Шкодран ёлғизланиб қолган бўлсада, савияли ўйнашда давом этди ва «шаҳарликлар»дан қолишмайдиган жамоа сафидан жой олди.

Эрик БАЙИ, «Вильярреал» «МЮ»

38 млн. евро

Моунинг Манчестердаги илк хариди кўпчиликни ажаблантирди - камтарин бир ҳимоячи учун шунча маблағ! Испания чемпионатини мунтазам кузатиб борадиган мутахассислар Байининг маҳоратидан хабардорлар. Ивуарлик футболчи уялтириб қўймайди. Топ-клуб талабларига мос келиши - бошқа масала. Нима бўлганда ҳам, ўтган мавсумда Эрик илк марта катта саҳнада ўйнади. Унинг эвазига олинган даромадга «ғаввослар» яна 5 нафар ёш иқтидорларни харид қилишади ва 2-3 йилдан сўнг Англияга ҳозиргидек «экспорт» қиладилар.

Гжегож КРИХОВЯК, «Севилья» «ПСЖ»

33,6 млн. евро

Агар Эмери билан қўшгудек бўлса, «Севилья» таркибидан клуб ошпазидан тортиб стадион ходимлари ҳам жой олишлари мумкин. Бундай вазиятда профессионал футболчилар ҳақида гапирмаса ҳам бўлаверади. Таажжубки, уларнинг ҳаммаси қандайдир ўсишга эришадилар. Польшалик таянч ярим ҳимоячиси эса юксак парвозни намойиш этди. Сампаолида уни сотиш режаси йўқ эди, аммо Эмери шогирдининг «ПСЖ»да тўп суришини истади.

Хесе РОДРИГЕС, «Реал» «ПСЖ»

25 млн. евро

Эмери Криховякдан ташқари яна бир Ла-лига вакилини харид қилди. Мадридда етарли ўйин амалиётига эга бўлмаётган Родригес энди Париж клубида ўйнайди. Зидан эса испаниялик футболчи учун «Реал» эшиклари доимо очиқ эканини таъкидлади. Фақат Родригес тезроқ ўз спорт формасини тиклаши лозим.

Лукас ПЕРЕС, «Депортиво» «Арсенал»

20 млн. евро

Агарда «Ким миллионер бўлишни истайди?» телеўйинига «Депортиво»ни ким олға сурмоқда?» саволи киритилса, барча жавоб вариантларида Лукас Перес номи қайд этиларди. Ҳужумчининг галисияликлар жамоасидаги нуфузи жуда юқори. «Арсенал»да юлдузлар етарли, аммо Лукас ҳам ўз ўрнини топа олади.

НОЛИТО, «Сельта» «Ман Сити»

18 млн. евро

«Сельта» етакчиси «Барселона» ва «Ман Сити» вариантидан инглиз жамоасини танлаганини таъкидлаб ўтди. Бунда мураббий ҳал қилувчи роль ўйнаган бўлса, ажабмас. Гвардиола ҳар ҳолда, барселоналик.

Клаудио БРАВО, «Барселона» «Ман Сити»

18 млн. евро

Гарчи Жо Хартда кетиш режаси бўлмасада, Браво келганидан кейин асосий посбон мақоми унда қолишига кафолат йўқ эди. 33 ёшли Клаудио ўтган мавсумни ёрқин ўтказди ва Пепга ёрдамга ошиқди.

Борха БАСТОН, «Атлетико» «Суонси»

18 млн. евро

Ўтган мавсумда ҳужумчи «Эйбар» сафида 18та гол уриб, испаниялик ҳужумчилар орасида 3-ўринни эгаллади. Ана шу маҳсулдорлик уни «Атлетико»га қайтарадигандек туюлганди. Бироқ Симеоне Бархадан кўра Гамейрони афзал кўрди.

А.АҲМЕДОВтайёрлади

«Харид қиламиз, майдалашмаймиз!»