Aytish mumkinki, bu borada ham intriga juda yaxshi ketmoqda. Garchi mavsum tugashiga 5ta tur qolgan bo'lsada, kim to'purar bo'lishi so'roq ostida turibdi.

Rubin Xebay ("Andijon") 11 (1) ta gol

"Andijon"ning bu yilgi tom manodagi topilmasi va Superliga kashfiyoti albaniyalik hujumchi bo'ldi, deya olamiz. Xebay "Nasaf" bilan ilk o'yindayoq g'alaba goliga assistentlik qildi. "Surxon" bilan o'yindagi qizil kartochkadan so'ng hujumchi ketma-ket 7ta o'yinda golli seriya qayd etdi. Bu mavsum eng uzoq golli seriya qayd etgan ham Xebay bo'ldi. Uning hisobida hozircha 11ta gol mavjud. Xebay joriy mavsum Superliganing 8ta jamoasi darvozabonlarini xafa qila oldi. Bundan eng ko'p jabr ko'rgan jamoalar "Metallurg" (3ta) va "Paxtakor" (2ta) bo'ldi. Agar Xebay bu yil to'purarlar poygasida birinchilikni hech kimga bermasa, Cheranning ketma-ket 4 yillik seriyasiga barham bergan bo'ladi

"Andijon"ning navbatdagi o'yinlari:

22-tur. "So'g'diyona" - "Andijon"

23-tur. "Andijon" - OKMK

24-tur. "Qizilqum" - "Andijon"

25-tur. "Turon" - "Andijon"

26-tur. "Andijon" - "Buxoro"

Dragan Cheran ("Paxtakor") 11 (4) ta gol

Aftidan Cheran bu yil ham to'purarlik annasini davom ettirmoqchi. Serbiyalik forvard 36 yoshda butsalarini mixga ilishni emas, to'purarlikni o'ylamoqda. Jarohat sabab safdan chiqqan Cheran qachon qaytishi borasida aniq xabarlar yo'q. Shu omil ham unga bu yilgi mavsumni poygada birinchi bo'lishiga to'siq bo'lishi mumkin. Bundan esa qolganlar foydalanib ketishi hech gapmas. Cheran 11ta golini Superliganing 8ta jamoasiga urdi. Eng ko'p "Metallurg" (3ta) va "Navbahor" (2ta) darvozalarini ishg'ol qildi. Aytish mumkinki, forvard so'nggi 4 yilda har mavsumni 15tadan kam gol urmagan holda yakunlagan.

2019. 23ta gol

2020. 20ta gol.

2021. 16ta gol.

2022. 20ta gol

"Paxtakor"ning keyingi o'yinlari:

23-tur. "Paxtakor" - "Turon"

22-tur. "Buxoro" - "Paxtakor"

24-tur. "Paxtakor" - "Nasaf"

25-tur. "Surxon" - "Paxtakor"

26-tur. "Paxtakor" - "Bunyodkor"

Silvanus Nimeli ("Surxon") 10ta gol

To'purarlar jadvalida bu yil legionerlar hokimlik o'rnatgani sir emas. Silvanus Nimeli yuqoridagi hamkasblaridan qolishmaslikka harakat qilmoqda. Umuman so'nggi ikki mavsumda termizliklar safida legionerlar asosiy "snayper" vazifasini bajarib kelyapti. O'tgan yili Ruben Sanches Peres 8ta gol bilan jamoasining to'purari bo'lgan edi. Nimelida ham to'purarlik uchun imkoniyat mavjud. Uni Xebay va Cherandan 1ta gol ajratib turibdi. Legioner forvard Superligada 8ta jamoa darvozasining to'rini titratdi. OKMK va "Nasaf"ga ikkita o'yinda ham gol urdi.

"Surxon"ning navbatdagi o'yinlari:

22-tur. "Neftchi" - "Surxon"

23-tur. "Surxon" - "Navbahor"

24-tur. "Metallurg" - "Surxon"

21-tur. "Surxon" - "Olimpik"

25-tur. "Surxon" - "Paxtakor"

26-tur. "So'g'diyona" - "Surxon"

Oston O'runov ("Navbahor") 8(2)ta gol

Oston O'runov yana avvalgi formasiga kirib olgani xursand qilmoqda. Yarim himoyachi bo'lishiga qaramay "Navbahor" tarkibida 8ta gol urishga erishdi. Unga etakchi bo'lib olishi uchun yana 4ta gol kerak. Mavsum yakunida raqobat yanada qizishini hisobga olganda, Ostonga oson bo'lmaydi. 2023 yilda futbolchi 8ta golini 4ta jamoa darvozasiga kiritgan. Oston "Turon" (3), "So'g'diyona" (2) va "Bunyodkor" (2), "Olimpik" (1) darvozabonlarini ranjitishni uddasidan chiqa oldi.

"Navbahor"ning navbatdagi o'yinlari:

23-tur. "Surxon" - "Navbahor"

22-tur. "Navbahor" - "Nasaf"

24-tur. "Navbahor" - "Bunyodkor"

25-tur. "Olimpik" - "Navbahor"

26-tur. "Navbahor" - "Neftchi"

Islom Kenjaboev ("Qizilqum") 8ta gol

"Qizilqum"ning so'nggi 5ta o'yinda Shulaya, Kenjaboev, G'iyosov triosi katta hajmdagi ishni bajarib berdi. Islom Kenjaboev ikkinchi davrada ketma-ket 5ta o'yindan beri raqiblar darvozasiga yo'l topib kelyapti. Agarda navbatdagi o'yinda ham gol ursa, Cheranning bu yilgi golli seriyasini takrorlaydi. Islom Kenjaboev joriy mavsum Superligada faoliyatidagi eng yaxshi natijani qayd etib bo'ldi (8ta gol). U so'nggi bor 2020 yil "Nasaf" tarkibida 5ta gol urgan edi. Bu albatta shaxsiy ko'rsatkichlardir.

"Qizilqum"ning navbatdagi o'yinlari:

23-tur. "Olimpik" - "Qizilqum"

24-tur. "Qizilqum" - "Andijon"

25-tur. "Neftchi" - "Qizilqum"

26-tur. "Qizilqum" - "Turon"

Superliganing 2023 yilgi to'purari kim bo'ladi?

Xebay Cheran erasiga barham beradimi? Superligada kim "snayper" bo'ladi?