Qishki transferlar oynasida barcha jamoalar yangi futbolchilar shartnoma tuzish va selekciya ishlarini olib borish bilan band. Qaysidir klub mahalliy futbolchilarga ko'proq etibor berayotgan bo'lsa, ayrimlar xorijlik futbolchilarga qiziqish bildirishmoqda. Transferlar oynasida eng "aktiv" bo'lib turgan jamoalardan biri - shubhasiz "Paxtakor". Ko'pchilik klublarimiz chempionlik yoki o'z oldiga qo'ygan maqsadi uchun butun yangi tarkib yig'moqda va ketma-ket transferlarni elon qilib tashlayapti. Klub muxlislarini bu narsa xursand qilishi mumkin, ammo tanganing ikkinchi tomoni haqida hech kim o'ylab ham ko'rayotgani yo'q. Keling, yangi mavsum oldidan tarkibini tubdan o'zgartirayotgan jamoalardan biri - "Paxtakor"ning transfer kampaniyasiga to'xtalib o'tamiz.

Butun vaziyat aniq bo'lishi uchun, biroz ortga qaytamiz. 2023 yilgi mavsum yakunlariga ko'ra "sherlar" yana bir marotaba O'zbekiston chempioniga aylanishdi. Ushbu chempionlik "Paxtakor" uchun ketma-ket beshinchi bo'ldi. Ikkinchi bor Superliga g'olibligini qo'lga kiritgan Maksim Shackix oltin medallar masalasi hal etilgan "Surxon"ga qarshi o'yindan keyin joriy mavsumda jamoangiz uchun eng raqib kim bo'ldi degan savolga mana shunday tarzda javob bergandi:

"Aniq qaysidir jamoani ayta olmayman. "Paxtakor" chempionatda hech kimdan kuchsiz emas. Biz eng kuchli jamoamiz, bizni hech bir raqib mag'lub eta olmaydi. Biz faqat o'zimizga o'zimiz mag'lub bo'lishimiz mumkin. O'zingiz bilasiz, "Paxtakor"ga qarshi har bir jamoa qo'shimcha motivaciya bilan o'ynayishini bilasiz-ku"

"Bunyodkor"ga qarshi kechgan mavsumning o'sha mavsumning so'nggi bahsidan so'ng esa jurnalistlar jamoa joriy mavsum 25ta gol o'tkazib yuborgani va bu natija o'tgan yilgi ko'rsatkichlarga qaraganda ancha yomonlashgani haqida so'rashgandi. Keyingi mavsumga tuzilayotgan rejalar bo'yicha Maksim Aleksandrovich shunday javob bergandi:

"Himoyada juda yomon o'ynayapmiz. Faqatgina himoyachilar emas. Hamma himoyalanadi, hamma hujum qiladi. Shunchaki juda yomon himoyalandik. Shu sababli shuncha gol o'tkazib yubordik. O'tgan safargi matbuot anjumanida ham aytgandim, bu bizni xavotirga solayotgan asosiy jihat"

"Barchasini bilib olasiz. Buni hozir ayta olmayman."

2023 yilda ham eng zo'ri bo'lgan "Paxtakor", 2024 yilgi mavsum oldidan o'z tarkibini o'zgartirishi va ko'proq yoshlarga etibor berishini elon qildi. Akademiya va yoshlar jamoasida chempionlikni qo'lga kiritgan futbolchilar asosiy tarkibga jalb qilindi va tajribali futbolchilarning o'rni yoshlar bilan to'ldirildi. Tarkibini jiddiy tarzda yoshartirib yuborilgan tarkib o'tgan mavsumda qanday natija qayd etganidan xabaringiz bor.

Bunday eksperiment o'zini oqladimi yo'qmi? Bu savolga aniq javob berish qiyin. "Paxtakor" Superligani 6-o'rinni egalladi va o'z tarixidagi eng yomon uchinchi natijani yangiladi.Klub prezidenti Jahongir Ortiqxo'jaev esa natija bunchalik yomon emasligini takidladi.

"Aslida yil boshida maqsadimiz chempionlik emasdi. Yoshlarga imkoniyat berishni maqsad qilgandik. Superligada 6-o'rinni egalladik, bu natijani qoniqarsiz deb bo'lmaydi"

Superligadagi 6-o'rinni qayd etgan "Paxtakor" mavsumda 11 marotaba g'alaba qozondi, 10 marotaba mag'lubiyatga uchradi va besh o'yinda durang qayd etdi. O'zbekiston tarixidagi eng ko'p marotaba chempionlikni qo'lga kiritgan jammavsumdagan mavsum ligadagi barcha bahslarning 39%da mag'lub bo'ldi. Mening fikrimcha, ushbu ko'rsatkich yurtimizning eng muvaffaqiyatli klubi uchun juda salbiy ko'rsatkich.

Mavsum o'rtasida Maksim Shackix qandaydir sabab tufayli(keyinchalik, sog'lig'idagi muammo tufayli deya elon qilindi) vaqtinchalik jamoani tark etdi. Amaldagi chempion yomon natijalar, bosh murabbiy bilan bo'lgan muammo va tarkibdagi muammolar girdobida qolib ketdi. Shunday qilib, "Paxtakor" 2024 yilni yakunladi.

Yangi "Paxtakor"

2024 yildagi qoniqarsiz natijalardan so'ng klubda katta o'zgarishlar ro'y berdi. Portugaliyalik mutaxassis Pedru Moreyra yangi bosh murabbiy etib tayinlandi. Klub esa dekabr oyining avvalida klub kelajagi haqida rasmiy anjuman tashkil etdi. Anjumanda yangi bosh murabbiy rasman tanishtirildi va Maksim Shackix klub direktorlar kengashiga o'tkazilgani elon qilindi. Aynan o'sha sanadan boshlab, "sherlar" yangi loyihaga start berdi deb hisoblasak bo'ladi.

Ayni damda jamoa Turkiyada yig'in o'tkazmoqda. Yangi mavsum oldidan jamoa o'z tarkibini kuchaytirmoqda va bir nechta yangi futbolchilar bilan shartnoma imzoladi. Klub hozirgi kunga qadar 6ta futbolchi bilan shartnoma imzolaganini rasman elon qildi, ular: Bashar Resan, Igor Sergeev, Mahmud Mahamadjonov, Jonatan Luis va Jonatan Lukkalar. Mahmud Mahamadjonov o'tgan mavsumning ikkinchi yarmidan buyon "sherlar" safida to'p tepayotgan bo'lsa, so'nggi mavsumlarni Tailand chempionatida o'tkazgan Igor Sergeev ham jamoaga qaytdi. Igor Sergeev klub safidagi eng yaxshi to'purarlardan biri hisoblanadi va hujumchiga adaptaciya uchun hech qancha kerak bo'lmasligi deyarli aniq.

Legionerlar esa umuman boshqa masala. Braziyalik yangi futbolchilar bilan yaqinroq tanishib olaylik.

1. Jonatan Lukka (Braziliya)

Jonatan Lukka klub rasman elon qilgan dastlabki braziliyalik futbolchi bo'ldi. 30 yoshlik futbolchining so'nggi klubi Portugaliya chempionati ishtirokchisi "AVS Futebol" edi. Ushbu klub joriy mavsumga Portugaliya chempionatiga yo'llanmani qo'lga kiritdi, klub bunga qadar Portugaliya 2-ligasida edi(Portugaliya yuqori ligasidan keyingi ikkinchi divizion, O'zbekiston Pro ligasidek). Yarim himoyachi joriy mavsumda 10ta uchrashuvda ishtirok etdi(jami 16ta o'yin o'tkazilgan). Futbolchi so'nggi marotaba 8 dekabr kuni "Kaza Piya" jamoasiga qarshi kechgan liga uchrashuvidan 90+3 daqiqada maydonga tushgandi. Portugaliya chempionatining 4-turi doirasida o'tkazilgan "Santa-Klara"ga qarshi o'tkazilgan maydonda 90 daqiqa harakat qilgan va aynan shu uchrashuv joriy mavsumdagi futbolchining yagona to'liq o'tkazgan uchrashuvi hisoblanadi. Jonatan bunga qadar "Roma"(Italiya), "Atletiko Paranaense B"(Braziliya), "Goa"(Hindiston), "Kelantan"(Malayziya), "Pyuyn Siti"(Hindiston), "Farense"(Portugaliya), "Belenensesh"(Portugaliya), "Stabek"(Norvegiya) klublarida to'p tepgan. Futbolchi bugunga qadar "Paxtakor" safida ikkita nazorat o'yinida ishtirok etdi.

Jonatan Lukkaning darajasi va u Superligada qanday o'ynab keta olishi ko'pchilikni qiziqtirayotgan savol. Portugaliya chempionatidagi autsayder jamoa safida "rotaciya" o'yinchisi bo'lgan futbolchi "Paxtakor"da o'zini ko'rsata oladimi?

2. Jonatan Luis (Braziliya)

33 yoshlik darvozabon futbolchilik faoliyatining asosiy qismini Portugaliya klublarida o'tkazgan. Darvozabon o'z vaqtida "Vitoriya Gimaraensh", "Moreyrense" va "Riu Ave" klublari darvozasini qo'riqlagan. U Portugaliyaning yuqori ligasida 125 ta o'yinda ishtirok etgan. So'nggi jamoasi "Riu Ave". Avvalgi mavsumda klubining asosiy posboni bo'lgan. 2023/24 yilgi mavsumda jami 29 marotaba asosiy tarkibda maydonga tushgan. Joriy mavsumda asosiy tarkibdagi so'nggi o'yinini 23 noyabrda mamlakat Kubogi 1/16 final bosqichi doirasida "Alverka" jamoasiga qarshi o'tkazgan. Ligadagi so'nggi o'yini esa 5 oktyabr sanasida o'tkazilgan "Famalikao" jamoasiga qarshi bahs edi. Darvozabon joriy mavsumda 9ta bahsda qatnashgan(jami 20ta uchrashuv o'tkazilgan). Braziliyalik darvozabon joriy mavsumda "Riu Ave"ning asosiy darvozaboni sifatida boshlagan, ammo oktyabr oyi boshidagi "Famalikao"ga qarshi o'yindan so'ng zaxiraga o'tirib qoldi. Uning o'rnini 23 yoshlik polshalik posbon Sezari Micta egalladi.

Jonatan Luis yaqin vaqtgacha Portugaliya chempionatining o'rtamiyona klubining asosiy darvozaboni bo'lgan. Ushbu transferni ishonch bilan yaxshi kelishuv deb hisoblasak bo'ladi. Braziliyalik posbon shubhasiz jamoani kuchaytiradi. Mening fikrimcha, Luis Superliganing eng yaxshi darvozabonlaridan biriga aylanadi(agar eng yaxshisi bo'lib olmasa) va jamoani "Al Rayyan"ga qarshi kechgan o'yindagidek yo'q joydan gol o'tkazib yuborishni to'xtatadi.

3. Flamarion (Braziliya)

Flamarion o'zbek futboli muxlislariga va ko'pgina Superliga klublarining murabbiylariga yaxshi tanish. Ushbu futbolchi bir necha mavsumdan buyon Gruziya chempionatida faoliyat yuritib kelgan. Bir nechta Superliga klublari ortda qolgan mavsumlarda ushbu futbolchining xizmatlariga qiziqish bildirishgan, hattoki muzokaralar olib borilgan. Bundan ikki mavsum muqaddam futbolchi "Navbahor"ga o'tishi mumkin edi. "Palmeyras" tarbiyalanuvchisi hisoblanadigan ushbu futbolchi asosan chap qanot vingeri va markaziy hujumchi poziciyalarida harakatlanadi. Futbolchi faoliyati davomida Chernorogiyaning "Lovchen", Rossiyaning "Rotor", Gruziyaning "Dinamo" Batumi klublarida o'ynagan. 2024 yildan boshlab Franciyaning "Valansen" jamoasida o'ynamoqda. "Valansen" joriy mavsumda Franciyaning "nasonal" ligasida ishtirok etmoqda(Liga 1 va Liga 2lardan keyingi uchinchi divizion hisoblanadi). "Valansen" o'tgan mavsumda Liga 2da ishtirok etayotgandi, ammo jamoa liga yakunlariga ko'ra so'nggi 20-o'rinni egallab, qo'yi ligaga ravon bo'ldi. Flamarion Gruziya chempionatida 139 ta o'yinda maydonga tushgan va 59 ta gol urgan. 23 marotaba assist qayd etgan. Bir mavsum quyi ligasida 32ta bahsda 24ta gol urgan. Rossiya Premer Ligasida esa 20ta o'yinda, 4 ta gol urishga muvaffaq bo'lgan.

Ushbu futbolchi ikki mavsum avvalgi sport formasini saqlab qolgan bo'lsa, "Paxtakor"ni kuchaytira olishi deyarli aniq. Futbolchi bunga qadar ham o'zbek klublarining qiziqish doirasida bo'lgan. Fikrimcha, Flamarion "Paxtakor"da asosiy kreativchi vazifasini bajaradi va hujum chizig'idagi asosiy futbolchilardan biriga aylanadi(agar bir necha mavsum avvalgi sport holatida bo'lsa).

4. Bashar Resan (Iroq)

Iroq terma jamoasi azosi "Paxtakor"ga o'tishi dekabr oyining dastlabki sanalaridayoq aniq bo'lib ulgurgandi. Resan bunga qadar hozirgi kunga qadar Iroq milliy terma jamoasi safida 60ta uchrashuvda maydonga tushgan va 4 golga mualliflik qilgan. 28 yoshlik hujumkor yarim himoyachi faoliyati davomida "Eyr Fors", "Qatar SK", "Al Marhiya" va "Persepolis" klublarida faoliyat yuritgan. Iroq va Eron chempioni bo'lgan Resan OFK Kubogida g'olib bo'lib, Osiyo Chempionlar Ligasida ikki bor finalga chiqqan. Futbolchi joriy mavsumda Iroq yulduzlar Ligasida 6ta va OCHL 2 musobaqasida 4ta uchrashuvda maydonga tushdi. Futbolchi Iroq terma jamoasining JCH-2026 saralashidagi kuzda o'tkazgan yig'inlariga chaqiruv olmadi. Bir yil avval o'tkazilgan Osiyo Kubogida ham bor-yo'g'i ikki uchrashuvda maydonga tushgan, Indoneziyaga qarshi kechgan 2-tur uchrashuvining 60 daqiqasida zaxiradan o'yin qo'shilgan bo'lsa, guruh bosqichining so'nggi o'yinida esa birinchi taymdan so'ng zaxiraga olingan. Resanning terma jamoadagi asosiy raqobatchilaridan biri Italiyaning "Komo" klubi azosi Ali Jassim. Katta iqtidorga ega yosh futbolchi, Bashar Resan asosiy tarkibdagi o'rnini yo'qotganining asosiy sababi.

Ko'pchilik futbol muxlislari, Bashar Resanni Iroq terma jamoasi asosiy futbolchisi deya qabul qilishayotgandi, ammo Resan asosiy tarkib o'yinchisi emas. Bashar Resan "Paxtakor" kuchaytira oladimi degan savol ham ko'pchilikda yo'q emas. Iroqlik futbolchi o'z darajasini namoyish eta boshlagandek, sababi Turkiyadagi yig'inlar vaqtida o'tkazilayotgan nazorat uchrashuvlarida o'zini yaxshi namoyish etmoqda. "Turon"ga (Ozarbayjon) qarshi kechgan o'yinda gol urdi va "Unirya Slobociya"ga qarshi o'yinda raqib futbolchisi o'z darvozasini ishg'ol etib qo'yishiga sababchi bo'ldi(deya xabar bermoqda "Paxtakor" klubi o'z ijtimoiy tarmoqlarida), biroq nazorat uchrashuvining va Superliga bahslarining darajasi turli xil. Ushbu futbolchi nimalarga qodir ekanligi va transfer qanchalik to'g'ri bo'lib chiqishini Superliga startidan so'ng bilib olamiz.

5. Igor Sergeev

So'nggi mavsumlarni legioner sifatida o'tkazgan terma jamoamiz azosi Osiyo Kubogida Avstraliyaga qarshi kechgan o'yinda jiddiy jarohat olgandi. Bu vaqt mobaynida futbolchi jarrohlik stoliga yotdi va uzoq vaqt davomida tiklandi. Sergeev yozda "Patum Yunayted" bilan shartnomasini uzaytirgan edi, lekin dekabr oyida hujumchi "Paxtakor"ga qaytgani malum bo'ldi. Faoliyatining asosiy qismini "sherlar" safida o'tkazgan Igor darajasini barcha biladi. Sergeevni tariflash uchun ortiqcha gap-so'zning keragi yo'q, statistikaning o'zi futbolchi uchun gapiradi, "Paxtakor" safidagi 180ta o'yin va 102ta gol.

Igor Sergeev jarohatidan forig' bo'lgan va imkon tezroq optimal sport formasiga qaytib olishi kerak. Sergeev yangi mavsumda chempionatimizning eng yaxshi to'purarlaridan biri bo'lishga nomzod.

P.S Mahmud Mahamadjonov o'tgan mavsumda ham "Paxtakor" safida harakat qilgani tufayli u haqda to'xtalib o'tirmaymiz. "Paxtakor" Mahamadjonov uchun "Bunyodkor"ga 150 ming evro pul to'ladi.

Moreyra yig'ayotgan "banda"

"Paxtakor" transferlar oynasida ancha faol bo'ldi va ko'pgina futbolchilarni o'z safiga qo'shib oldi, transferlar ko'p qismi yangi bosh murabbiyi Moreyraga tanish bo'lgan o'yinchilar bo'ldi. Shu bilan Pedru Moreyra "Paxtakor"da kichik portugal zabon "banda"ni yaratdi. Ushbu futbolchilar jamoani haqiqatdan ham kuchaytira oladimi yoki portugaliyalik mutaxassis faqatgina o'zi bilgan va tanigan futbolchilariga ishonadigan, ularni har doim o'zi bilan "etaklab" yuradigan yana bir murabbiymi?

Klub prezidenti Jahongir Ortiqxo'jaev biznesiga aloqador bo'lgan va ijtimoiy tarmoqlarda "Paxtakor" haqida xabarlar yozayotgan Humoyun Nig'matov X(sobiq tvitter) tarmog'ida yozishicha, klub jami 7ta transferni amalga oshirishni rejalashtirgan. Humoyun Nig'matov jamoaga aloqadorligi yoki klub tizimida qanday lavozimga ega ekanligi hozirgacha rasman elon qilinmagan

"Dastlabki kelishuv amalga oshdi, yana oltitasi oldinda"

"Paxtakor" yangi mavsumda xalqaro maydondagi musobaqalarda ishtirok etmaydi(OCHL va OCHL 2ning yangi mavsumlari), "sherlar" faqatgina Superliga va O'zbekiston Kubogi bahslariga bor etiborlarini qaratadi. Chempionlik uchun raqobatchi bo'lgan "Nasaf" Elit Osiyo Chempionlar ligasida, OKMK esa CAFA tashkil qilayotgan klublar o'rtasidagi musobaqada qatnashadi. Chempionlik uchun kurashadigan faqatgina bir jamoa "Neftchi" faqatgina Superliga va Kubokda ishtirok etadi. "Paxtakor" faqatgina mahalliy musobaqalarda ishtirok etishi jamoaga qo'l kelishi mumkin.

"Paxtakor" bir mavsum yoshlarga imkoniyat berib ko'rdi va ushbu eksperiment o'zini oqladi deyish qiyin masala. Endi rahbariyat yangi loyihani boshlamoqda. Katta niyatlar va vadalar bilan boshlanayotgan yangi bosqich yakunda qanday natijalarga olib kelishi barcha uchun qiziq. Jamoani fevral oyida Elit Osiyo Chempionlar ligasidagi jiddiy raqiblar kutib turibdi. Yangi mavsumda "yangi" "Paxtakor"ni kuzatib borish qiziqarli bo'lishi aniq.

Yangilanayotgan "Paxtakor" yoxud Pedru Moreyra yig'ayotgan portugal zabon "banda"