O'zbekiston U-23 terma jamoasi Yaponiya U-23 terma jamoasi bilan chorak finalda bahs olib borib, yirik 4:0 hisobida g'alaba qozondi. Shunday qilib vakillarimiz yarim finalga yo'l olishdi, Yaponiya esa musobaqani tark etdi.

O'yindan keyingi matbuot anjumanida yaponiyaliklar bosh murabbiyi Xajime Moriyasu bu mag'lubiyatga yosh farqining aloqasi yo'qligini aytdi:

- "Natija hammasini ko'rsatib turibdi. O'zbekiston jismoniy tomondan kuchli deb aytgandim. Ular bizga bosim qilganda, o'yinchilarimiz nima qilishni bilmay shoshib qoldi va ko'p bora to'p yo'qotdik".

- "Ha, biz musobaqaga 20 yoshli futbolchilar bilan kelganmiz. Asosiy maqsad, jamoani 2020 yil bo'lib o'tadigan Olimpiada o'yinlariga tayyorlash. Lekin men mag'lubiyat sababini ikkala jamoa orasidagi yosh farqi bilan izohlamoqchi emasman. Va bu haqda boshqalar ham gapirishini xohlamayman".

- "Eng muhimi, biz musobaqadan kerakli saboq chiqarishimiz lozim. Vaqt o'tib bu jamoa shakllanib boradi. Yapon futbolchilarida mentalitet kuchli, ular bir mag'lubiyat bilan sinib qolishmaydi. Harakat qilishda davom etsak, hali o'samiz va to'rt yildan keyin yanayam kuchli bo'lamiz".

Yaponiya U-23 murabbiyi kechagi mag'lubiyatga yosh farqini aralashtirmaslikni so'radi