Еврофутбол ихлосмандларининг диққати "Манчестер Сити" ва "Пари Сен-Жермен" жамоалари ўртасидаги баҳсга қаратилиши шубҳасиз. Ушбу клублар ўртасида Парижда ўтган дастлабки ўйин "шаҳарликлар"нинг ғалабаси билан ниҳояланган эди (2:1). Агар француз жамоаси қаторасига 2-йил турнир финалига йўл олишни истаса, Пепнинг "Сити"си "Туманли Альбион"да енгиши керак.

Бўлажак учрашув ўз йўлига. Биз тарихга назар солиб, жамоаларнинг амалдаги бош мураббийлари ўртасидаги "жанг"ларга эътибор қаратдик.
Маурисио Почеттино "Эспаньол", "Тоттенхэм" ва ПСЖ устози сифатида Гвардиола бошчилигидаги "Барселона", "Манчестер Сити" жамоаларига қарши 19 бор беллашган. Улардан 11 тасида испаниялик, 3 тасида аргентиналик мутахассис зафар қучган, ўйинларнинг 5 тасида кучлар тенг келган.

Ушбу баҳсларда Пепнинг жамоалари 36 та гол уриб, 19 та ўтказиб юборган.
Мураббийлар ўртасидаги тўқнашувларда энг йирик ҳисоб 2010 йилнинг 18 декабрида қайд этилган ("Эспаньол" 1:5 "Барселона"). Қуйида ўша баҳсда урилган голларни томоша қилинг.

Почеттино ва Гвардиола ушбу мавсумга қадар ЕЧЛда фақат 1 марта тўқнаш келишган. "Тоттенхэм" 2018-19 йилги мавсумнинг чорак финалида "Манчестер Сити"ни доғда қолдириб, ярим финал йўлланмасини қўлга киритди.

Бугунги ўйин мазкур мураббийлар ўртасидаги 20-си бўлади. Нима деб ўйласиз, Почеттино Пепга қарши "жанг"лардаги 4-ғалабасини қўлга кирита оладими?

Сенсация

Фахриддин Рўзиев

Йигирмада 4-ни кўрамизми?