Lekin oxirgi paytlarda bunga barham berilganiga guvoh bo'lyapmiz. Har holda, tarkibda mahalliy yosh futbolchilar paydo bo'lishdi. Jamoa o'zagi asta-sekinlik bilan o'sha yoshlar atrofida shakllantirib borilyapti. Bu juda yaxshi. Yuriy Lukin o'tgan yili jamoani oliy ligada saqlab qoldi. Endi esa u o'rtamiyonalar qatoriga qo'shilishi mumkin bo'lgan jamoani tuzish bilan band. O'zgarish unchalik ko'p sodir bo'lgani yo'q. 7 nafar futbolchi “Qizilqum”ga kelib qo'shildi. To'g'ri, jamoani tark etganlar soni anchagina, biroq ularning aksariyati o'tgan mavsumning birinchi davrasidan keyin Navoiydan ketib bo'lishgandi.

Shishelov, Jo'raev, Jumaev va Vagapov sobiq jamoalariga qaytishdi deb aytsa bo'ladi. Sadinov, Qurbonov hamda Shodmonov tarkibni kuchaytirish maqsadida taklif etildi. Ularning barchasi o'zlarini ko'rsatib ulgurgan futbolchilardir. “Qizilqum” yangi o'yinchilar uchun maqsadsiz pul sarflashdan voz kechgani ko'rinib turibdi. Endi yosh futbolchilarga etibor qaratadigan payt etib keldi. Shuncha yil legionerlar va o'rtacha saviyadagi yoshi katta o'yinchilarga pul sarflandi, biroq buning foydasi deyarli sezilmadi. Jamoa autsayderlar safidan uzoq muddatga chiqa olmadi.

Shuningdek, yoshlar bilan o'ynaganda katta mablag' sarflanmaydi. Bu ham mablag'ni tejash, ham yangi istedodlarni tarbiyalash deganidir. Lukin “Zarafshon”da ishlab, yoshlar bilan yaxshi jamoa tuza olishini ko'rsatdi. “Qizilqum” viloyat markaziga ko'chirilgach, jamoaga bo'lgan etibor va talab ortishi tayin. Bu yil ushbu jamoani jadvalning o'rta pog'onalarida ko'rsak, bu ham yomon natija bo'lmaydi.

“QIZILQUM”
Keldi                       Qaerdan
Vladimir Shishelov    “Metallurg” Kuzbass
Sherali Jo'raev          “Olmaliq”
Ruslan Vagapov           “Metallurg”
O'ktam Sadinov    “Zarafshon”
Mirjalol Qurbonov “Guliston”
Samandar Shodmonov    “Nasaf”
G'ayrat Jumaev             “Neftchi”

“Qizilqum”ni 2013 yil maydonga tushgan futbolchilardan naqd 20 nafari tark etgan. Lekin bu bilan jamoa sezilarli tarzda kuchsizlanmadi. Chunki o'zgarishlar ko'proq o'tgan mavsumning birinchi davrasidan keyin ro'y bergandi. Qolaversa, mahalliy o'yinchilar ham saviya borasida boshqalardan qolishmasliklarini namoyish etishyapti. Lukin imkon qadar tarkibda oldiga qo'yilgan maqsadga erishish yo'lida kurasha oladigan futbolchilarni qoldirdi. Yangi kelgan o'yinchilar esa jamoaga moslashib ketishda yomon taassurot qoldirishmayapti. To'g'ri, Shishelov hozircha gollar hisobini ochganicha yo'q, lekin Volodya raqib himoyachilarini o'ziga jalb etishi bilan ham navoiyliklarga yordam beradi. Ayni paytda “Qizilqum”ning himoyadagi ishlari yomon emas, biroq raqib darvozasini ishg'ol qilishda muammolar mavjud. Aynan shuni hal etgan taqdirda Lukin bemalol yaxshi natijaga umid qilishi mumkin.

2012 yilgi tarkibga etibor qaratsak, undan Jabborov, Makosin, Xoliqov, Rustamov, Usmonov, Jo'raev, Qambarov, Haydarov va Abdullaevning o'ynab kelayotganini ko'ramiz. Bu yomon ko'rsatkich emas. 9 futbolchi jamoa o'zagini tashkil qilishi mumkin. Bu raqam futbolimiz darajasida yomon emas. Bazi jamoalarda ikki yil oldinga tarkibdan buncha ancha kam futbolchilar qolgan.

Ketganlar: Xurshid Yo'ldoshev, Ravshan Mehmonov, Zafar To'raev, Isroil Ergashev, Eldor Tojiboev, Aziz G'ulomxo'jaev, Ilya Ilin, Temur Yafarov, Avaz Agaliev, Azamat Abdullaev, Yanis Manzukas, Muqim Toshmatov, Andrey Vlasichev, Timur Vasilev, Timur Ayzatulov, Alisher Samatov, Jalil Kimsanov, Farruh Shotursunov, Olim Navkarov, Feruz Boboqulov.

2012 yilgi tarkibdan qolganlar: Erkin Jabborov, Artyom Makosin, Akmal Xoliqov, Akmal Rustamov, Aziz Usmonov, Sherali Jo'raev, Fayzulla Qambarov, Farruh Haydarov, Aziz Abdullaev.

Jamoalarda yuzaga kelgan o'zgarishlarni tahlil qilishimizning sababi, ayni paytda klublarimiz qay darajada barqaror ekanligini ko'rsatishdan iborat. To'g'ri, bu hamisha ham jamoaning natijalariga tasir ko'rsatmasligi mumkin, lekin “Andijon” va “Navbahor” misolida buning salbiy tasiri borligini ko'rib o'tgandik. Kelasi haftada ham yana ikki jamoadagi tarkib bilan bog'liq o'zgarishlarga to'xtalamiz.

Behzod NAZAROV.

Jamoalardagi o'zgarishlar: Kimga foyda-yu, kimga zarar? "Qizilqum"