-Oxirgi turda safarda “Buxoro” jamoasiga qarshi qiyin o'yinni o'tkazganimiz bugun o'zining salbiy tasirini ko'rsatdi, - deya so'z boshladi Zoir To'raqulov. - O'z maydonimizda o'ynashimizga qaramay, bugun jamoamizning o'yini chiqmadi.

-Oxirgi ikki uchrashuvda mag'lubiyatga uchragani ham “Qizilqum”ni bugun jamoamizga qarshi ikki baravar kuch bilan maydonga tushishga undagan bo'lsa ajabmas. Uchrashuvni yomon boshlamadik. Hatto, tezkor gol ham kiritdik. Odatda, bunaqa vaziyat jamoaga kuch bag'ishlashi, g'alabaga undashi lozim. Ammo bugun buning aksini ko'rdik, ochig'i, raqibimiz bunga imkon bermadi.

-Jamoamizda ichki muhit yomon, deya olmayman. Futbolchilarimizni o'zlarini ko'rsatishlari uchun barcha shart-sharoitlar etarli. Bugungi mag'lubiyatni qanday izohlashga ham hayronman. Qolaversa, futbolda omad ham ko'p narsani belgilaydi. Buxoroda ham naqd g'alabani qo'ldan chiqazgandik. Himoya chizig'imizda muammolar yo'q emas, albatta. Bugun raqibimiz aynan himoyada yo'l qo'yilgan xatolar evaziga jamoamizni jazoladi.

-Ammo tushkunlikka tushish yaramaydi. Oldinda yana to'rtta uchrashuv kutib turibdi. Ularda maksimal natija qayd etib, muxlislarimizni quvontirishga harakat qilamiz, albatta. Mavsum oxirida kuchli o'nlikdan joy olishni mo'ljallaganmiz.

Zoir To'raqulov: “Raqib xatolarimizdan unumli foydalandi”