"Олмалиқ” мураббийлари кейинги турда учта футболчи хизматларидан фойдалана олишмайди. Сабаби Игорь Петкович ва Георги Квесиешвили мавсумдаги тўртинчи сариқ карточкаларини ишлаб олишган бўлса, Санжар Шоаҳмедов “Бухоро”га қарши ўйинда қизил карточка олди. Бу ўйинчилар 22-турдан ўрин олган “Бунёдкор”га қарши ўйинда майдонга туша олишмайди.

“Бухоро” ҳам “Олмалиқ”қа қарши ўйинда уч нафар футболчисидан “айрилди”. Бахриддин Ваҳобов ва Девид Ония тўртинчи бор сариқ карточка ишлаб олишди, Алишер Маҳмудов эса ўйин охирида қизил карточка билан “сийланди”. Энгди учала ўйинчи ҳам 18 октябрь куни бўлиб ўтадиган “Бухоро” – “Гулистон” учрашувини фақат томоша қилишади холос.

Кейинги турни ўз майдонида “Қизилқум”га қарши ўтказадиган “Навбаҳор” иккита футболчисини майдонга тушира олмайди. Сабаби Азимжон Аҳмедов ҳамда Рустам Аъзамов “Гулистон”га қарши кечган ўйинда огоҳлантириш олишди. Уларнинг сариқлари сони тўрттага етди.

“Нефтчи” ҳужумчиси Носир Отақўзиев “Насаф”га қарши ўйинда захирадан майдонга тушиб кетма-кет икки бор сариқ карточка олиб майдонни тарк этди. Тажрибали ҳужумчи кейинги турдан ўрин олган “Сўғдиёна”га қарши Фарғонадаги баҳсни ўтказиб юборишга мажбур бўлади.

Нарзулла Сайдуллаев

22-тур дисквалификациялари