Ўтган йил илк бор ўтказилган мусобақа анъанавий тус олди. Ушбу турнир ташкилотчилари раҳматли Ахбор доданинг фарзандлари ва набиралари. Бу йил жами 10 та жамоа унда иштирок этмоқда. Булар: ЎФА, "Сулола", ЎзПФЛ, "Пахтакор", "Championat.asia", "Спорт ТВ", ЎзФҲМ, "Kun.uz", "Журналист" ва "Тонг 2".
"Championat.asia" жамоаси кеча "Пахтакор" афсоналарига қарши баҳс олиб бордик. Рақиб сафида Павел Бугало, Мурод Алиев, Шуҳрат Мақсудов, Собир Ходиев, Абдумажид Тоиров, Акмал Шораҳмедов каби яқин ўтмиш юлдузлари тўп тепишди. Яқин йилларгача уларнинг кўпчилиги ўйинларини ёритиб келганмиз, кеча эса майдонда қарши ўйнадик. Учрашувдан олдин "Пахтакор" яққол фаворит эди, аммо ўйинда аслида ундай эмаслигини исботлай олдик. Шахсан ўзим афсонавий посбон Павел Бугало дарвозасига 3та тўп киритдим. Қачондир Бугало қўриқлаётган дарвозага хет-трик қиламан деб ўйламасдим. Ёшидан қатъи назар у афсона ва бу голлар мен учун қадрли бўлиб қолади. Бундан ташқари, беллашув давомида бир эпизодда Акмал Шораҳмедовни Иньеста услубида алдаб ўтдим ва ўша паллада гол ургандан кам ҳурсанд бўлмадим. Ўша эпизодни суратлар ёрдамида кўрсатиб беришга ҳаракат қиламан.
Суратлар учун Рустамхўжа Набихўжаевга раҳмат.
Ўз навбатида бизнинг дарвозага киритилган 3 та голга ҳам улардан бир футболчи муаллифлик қилди: Собир Ходиев. Салгина аламлиси эса биз 3:2 ҳисобида олдинда бораётганимизда баҳс тугашига бир неча сониялар қолганда ўз дарвозамизга пенальти олиб келдик ва тажрибали рақибларимиз ҳисобни тенглаштириб кетишди. Мусобақа регламентига кўра ўйин дуранг билан тугаса пенальтилар сериясига мурожаат қилинади. Унда ғолиб 2 очкога эга бўлади, мағлуб эса бир очко билан қолади. Серияда "Пахтакор" афсоналари бизни мағлуб этишди - 1:4. Турнир сенсациясини қайд этишимизга бир неча сония етмай қолди)
Биринчи кундаги ўйинлардан кейинги тўпурарлар рўйхати.
Учрашув якунланганидан кейин Акмал Шораҳмедов ўйинимизни алоҳида эътироф этиб кетди ва мақтади. Миллий терма жамоамиз тарихидаги энг яхши ўнг қанот ҳимоячиларидан бирининг эътироф ўйинимизга энг яхши баҳо деб айта оламан. Кеча майдонда сайтимизнинг барча ходимлари борларини беришди, иштиёқ жуда кучли эди. Майдондаги меҳнат учун уларнинг ҳар бирига раҳмат. Биз бир жамоамиз.
Ўз навбатида анъанавий тарзда ўтказила бошлаган турнир учун Ахбор доданинг фарзандлари ва набираларига алоҳида раҳмат! Зеро, бундай муҳитда ва бунақанги афсоналарга қарши ҳар доим ҳам тўп тепиш имкони бўлавермайди. Ҳаммага омад, файзимизни берсин!
Изоҳлар