"Кураш давом этмоқда. Бундан буён фақат қийин бўлаверади. Сабаби кичик хато жуда қимматга тушади. Бу босқичдан ҳам муваффақиятли ўтмоқчимиз", - деб гап бошлади Александр Волков.

"Биз учун қаерда ўйнашнинг деярли фарқи йўқ. Ўзи шундоғам фақат сафарда ўйнаяпмиз. Қатарда, Бухорода, "Пахтакор"да ва "Жар"да. Шу боис бизга унча фарқи йўқ".

"Ўтган сафар матбуот анжуманига Олег Зотеев келганди ва ғолиб бўлгандик. У бугун ҳам келди. Иримга ишонмайман. Шунчаки, жамоадаги энг ҳазилкаш футболчи - Зотеев. Шунга уни яна бир бор матбуот анжуманига олиб келдик".

"Акмал Шораҳмедовнинг легионерлар ҳақидаги фикрларини қўллаб-қувватлаймиз. Олдинлари "Бунёдкор"ни ОЧЛда асосан легионерлар кейинги босқичга олиб чиқишарди. Ҳозир эса асосий босим маҳаллий йигитларга тушмоқда".

"Эртага Симоненко дисквалификация туфайли ўйнай олмайди. Уни ўрнини Хайрулла Каримов, Анвар Ғофуров эгаллаши мумкин. Шу сабабли бу катта йўқотиш эмас. Фақат ярим ҳимояда кичик муаммолар бор. Баъзи футболчиларимиз касал".

"Гуруҳдан бир амаллаб чиқдик. Энди икки ўйинда бор кучимиз билан ўйнаш талаб қилинади. "Ал Ҳилол" кучли клуб бироқ, ютишга ҳаракат қиламиз", - дейди Олег Зотеев.

Александр Волков: "Кейинги босқичга чиқмоқчимиз"