Хусусан, 13-14 декабр кунлари Қирғиз Республикасининг Ўш шаҳрида спортнинг футзал тури бўйича 2009-2010 йилларда туғилган болалар ўртасида халқаро мусобақа ўтказилди.

Унда Ўзбекистондан Андижон шаҳар Олимпия ва миллий спорт турлари бўйича давлат ихтисослаштирилган мактаб-интернати ва Фарғона вилояти футзал жамоалари иштирок этди.

Қизиқарли ва муросасиз ўтган мазкур мусобақада якунда андижонлик ёш футзалчилар чемпионликни қўлга киритди.

Мураббий Аҳрорбек Иминов бошчилигидаги Андижон шаҳар ОМСТБДИМИ-2009 жамоаси финалда Жалолобод жамоаси ёшларини 6:0 ҳисобида мағлуб этди.

Турнир ташкилотчилари андижонлик ёшлардан Низомиддин Зиёхиддинов билан Асадулло Раҳимовни ўз ампуласи бўйича энг яхшилар қаторида алоҳида эътироф этиб, махсус соврин билан тақдирлади.

Мазкур мусобақадан сўнг ғолиб жамоа бош мураббийи Аҳрорбек Иминовнинг фикрлари билан қизиқдик.

- Албатта, мазкур мусобақа биз учун жуда ҳам фойдали бўлди. Ўтган йили ҳам ушбу турнирда иштирок этгандик. Мусобақа савияси ёмон эмас. Асосийси, қўл остимиздаги ёш футболчиларнинг халқаро тажриба ошириши ҳамда ўйин амалиётига эга бўлиши эди. Беллашувлар биз учун осон ўтмади. Шогирдларимнинг ҳаракатларидан қониқдим. Улар берилган кўрсатмаларни тўлиқ бажаришга ҳаракат қилди. Якунда мусобақа ғолибига айландик. Албатта, бу натижа ҳам бизга қўшимча куч бағишлайди. Турнир ташкилотчиларига ўз миннатдорчилигимни билдираман, деди Иминов.

Андижонликлар Қирғиз Республикасида чемпион бўлди