Қишки йиғинларни асосан "шерлар" билан ўтказган футболчи куни-кеча собиқ жамоаси "Бухоро" йиғинига бориб қўшилди.

- "Бухоро"нинг Тошкентда ўтказаётган машғулотларига 26 февраль куни келиб қўшилдим. Бунгача эса "Пахтакор" таркибида Туркияда шуғулланаётгандим", - дея гап бошлади Анвар Ражабов.

- "Пахтакор" ўйинига киришиб кетишингиз қийин кечдими?
- Йўқ, мен бундай демаган бўлардим. Чунки бу клубга кеча келмадим. Ўтган йили ярим йил шерлар таркибида бўлганман. Тўғриси ҳар қандай футболчи операциядан кейин бирданига яна аввалгидек ўйнаб кетиши қийин. Мураббийлар Туркияда менга Ўзбекистонга қайтиб "Бухоро" йиғинига бориб қўшилишим кераклигини айтганидан кейин, қайтиб келдим.

- Демак, бу йил сизни "Бухоро" сафида кўрар эканмизда?
- Катта эҳтимол билан шундай. Олдимда бошқа клубга ўтиш вариантлари ҳам турганди. Лекин "Бухоро" мен учун қадрдон жамоа. Айнан бу клубда ўйнаб футболчи сифатида шаклландим. Қолаверса оиламга яқин бўламан. Шу боис бир йил "Бухоро"да ижарада ўйнасам керак.

- "Бухоро"ни айни пайтда Эдгар Гесс бошқармоқда. Илгари бу мутахассис билан бирга ишлагансиз. Тўғрими?
- Ҳа, "Насаф"да Гесс билан йўлларимиз кесишгандим. Катта тажрибага эга мураббий. Қаттиққўл ва талабчан. Машғулотлари ҳам яхши. Ҳозирча мураббий билан яккама-якка суҳбатлашиш имкони бўлмади.

- Айни пайтда спорт формангизни неча фоизга баҳолаган бўлардингиз?
- Ёмон эмас. Биласизми ҳозир ҳеч қайси футболчи 100 фоиз тайёр холатда бўлмайди. Чемпионатнинг 3-4 тури ортда қолганидан кейингина бундай кўрсаткичга чиқиш мумкин. Мен ҳам бугунги тайёргарлигимдан нолимайман.

Исломбек Рустамбеков суҳбатлашди.

Анвар Ражабов: "Бухоро"да бир йил ижарада ўйнайман"