"Жамоамиз билан яхши тайёргарлик кўрмоқдамиз, кайфият аъло даражада. Олдинда Эронни ютиб, алам оладиган вақт келди. Мухлисларга ажойиб ғалаба тақдим қилмоқчимиз",- дейди Азиз Турғунбоев.

- Ўтган ўйинда гол урдингиз...

- Ўтган ўйин яхши бўлди. Машғулотларда ҳам гол уришга кўпроқ эътибор қаратгандик. Мақсадимиз кўпроқ гол уриб, финалга чиқиш эди. Гол урдик, ғалаба билан барчани табриклайман.

- "Пахтакор"га келганингизда чап қанот ҳимоячиси сифатида ҳам ҳаракат қилдингиз. Терма жамоада ўнг қанотда ўйнамоқдасиз. Балки Тимур Кападзе сизни ҳужумга қўяр?

- "Пахтакор"да чапда тўп тепганимни сабаби бу қанотдаги футболчида жароҳат бор эди. Менга асосан ҳужумда ёки ярим ҳимояда ўйнаш қулай.

- Сиз учун қайси тактика қулай, орқада 3 нафар ҳимоячи ўйнаганими ёки 4 нафар?

- Тактикани мураббий танлайди, 4 талик ёки 3 таликда ҳам ўйинимиз яхши чиқмоқда.

- Жалолиддин Машарипов йўқ, терма жамоада кайфият учун ким жавобгар?

- Жалолиддин Машарипов машғулотдан ташқарида келиб кайфият кўтариб турибди. Бу ерда Шомуродов, Файзуллаев бор. Ҳаммада кайфият аъло даражада, финалга тайёрмиз.

- Эрон билан охирги ўйинларда кўп бор дуранг ўйнамоқдамиз. Эртага дуранг бўлса, пенальтилар серияси учун режа тузилганми?

- Албатта, пенальтилар серияси учун режамиз бор. Лекин уларни ўйинда енгишга ҳаракат қиламиз.

Азизбек Турғунбоев: "Эрондан алам оладиган вақт келди"