"Барселона" Роберт Левандовскидан "Бавария"га бонус тўламаслик мақсадида гол урмасликни сўраган. Бу маълумот ҳужумчининг Себастян Сташевский томонидан ёзилган ва Польшада нашр этилган таржимаи ҳолида келтирилган. "Левандовски: Ҳақиқий" номли китобда "Барса"нинг ҳужумчидан Ла Лига 2022/23 мавсумининг сўнгги ўйинларида гол уришни тўхтатишни сўрагани ҳақида ёзилган. Бунинг сабаби, агар у 25 тадан ортиқ гол урса, трансфер шартномасида кўрсатилган бонусни тўлашга мажбур бўлиши эди. Айтилишича, каталонияликлар клубнинг молиявий қийинчиликларини сабаб қилишган.

Китобда ёзилишича, "блауграна" Хави бошчилигида Ла Лигада ғалаба қозонгач, машғулотдан сўнг Левандовский бир неча раҳбарлар, шу жумладан президент Жоан Лапорта билан учрашиш учун кабинетга таклиф қилинган. Сташевскийнинг сўзларига кўра, директорлардан бири унга кутилмаган таклифни билдирган: "Роберт, биз сизнинг сўнгги ўйинларда гол урмаслигингизни хоҳлаймиз." Шунда футболчи унга ҳайрон бўлиб қараган. Китобда таъкидланишича, "гарчи чемпионлик унвони ва энг яхши тўпурар мукофоти аллақачон аниқланган бўлса-да, ўн йилдан ортиқ вақт давомида энг юқори даражадаги фаолияти давомида ҳеч ким ундан гол уришни тўхтатишни сўрамаган эди"

Китобда айтилишича, "Барса" польшалик ҳужумчи чемпионатдаги 25 та голдан ошиб кетса, "Бавария"га қўшимча 2,5 миллион евро бонус сифатида тўлаши керак бўлган. Натижада Левандовски сўнгги икки ўйинда бирорта ҳам гол ура олмаган ва ўша мавсумда унинг ҳисобида Ла Лигада 23 та гол қайд этилган.

"Барселона" 2022/23 йилги мавсумнинг охирида "Бавария"га бонус тўламаслик мақсадида Левандовскидан бошқа гол урмасликни сўраган