"Тўғриси айтсам жуда ҳам аламли мағлубият бўлди. Ўйин жанговор тарзда ўтди, мухлисларга ёқди деб ўйлайман. Ҳимояда кўпроқ ўйнасак ҳам қарши ҳужумларда гол уришга интилдик. Дуранг бизни қониқтирса ҳам охиригача ғалабага умид қилдик. Шу сабабли ҳам Абдумалик Абдуллаевни майдонга туширдим. Бугун ҳар иккала жамоа посбонлари яхши ўйнашди. Рақиб дарвозабони Александр Лобанов бир-иккита хавфли зарбалардан сўнг тўпни қайтарди", - деб гап бошлади Ашурматов.

"Очиғи ҳакамлик ҳақида гапиришни хоҳламайман".

"Бугун фақат Шаҳбоз Эркиновни ҳужумда тушурдим. Качурга ҳеч қандай эътирозим йўқ. Шунчаки рақибга қараб битта ҳужумчи билан ўйнадим. Мансур Саидов ва Бобур Акбаров захирада қолдирилди. Дилшод Жабборовнинг тайёргарлиги яхши бўлгани учун унга ишондим. Жароҳатидан энди қутулган Азим Аҳмедов бугун марказда жуда фаол ўйнади".

"Осиё ўйинларида Саудия Арабистонига қарши баҳсда сўнгги сонияларда гол ўтказиб юбориб мағлуб бўлдик. Бундай ҳолатларда жавоб тўпи киритишнинг имконияти қолмайди. Бугун худди шундай ҳолат такрорланди..."

"Мавсум якунига кўра олтинчи ўринни олиш вазифаси ҳали олиб ташланмади. Охирги турга қадар шу ўринга чиқиш учун ҳаракат қилаверамиз".

"Агар менинг терма жамоада ишлашим "Навбаҳор"га қандайдир салбий таъсир кўрсатса раҳбалар ва мухлисларнинг истагини ҳам инобатга оламан ва бошқа мураббийга топшираман. Лекин клуб учун боримни беришга тайёрман. Бу ерда ишлаш маъсулиятли ва шарафли деб ҳисоблайман".

"Андижон"га қарши ўтган ўйиннинг дискини кўриб чиқдим. "Сўғдиёна" билан баҳс эса тасвирга олинмаганини айтишди. Жиззах клуби билан алоқага чиқиб дискни қўлга киритмоқчиман. Бизни жамоада ўйинни сотадиган футболчи йўқ. Агар худо сақласин шундай футболчи борлигини билиб қолсам уни халқ олдига чиқариб барча айбини бўйнига қўяман".

"Бугун кучли жамоа ғалаба қозонди, сабаби омад кучлиларга кулиб боқади. Биз 5-6та ўйинда сўнгги дақиқаларда гол ўтказиб юбордик. Балки бизга куч етишмаётгандир, балки эътибор етишмаётгандир".

Бахтиёр Ашурматов: "Жуда аламли мағлубият бўлди"