Келинг аввал бир саволга жавоб бериб ўтсам. "Металлург" очко олиши мумкин эдими?

Ҳа, агар майдоннинг ҳолати яхши бўлганида. Майдонда тўп жуда ҳам оғир ҳаракат қилди. Футболчиларни ҳаракати ҳам жуда суст. Натижада кўпгина вазиятларда икки жамоа аъзолари ҳам тўпни қабул қилишда ва узатишда кўплаб хатоларга йўл қўйдилар. 16-дақиқада Одилов 100% имкониятни қўлдан бой берди. Қанотдан етказиб берилган тўпга тепиш чоғида, 11 метрлик нуқта олдида у майдоннинг ҳолати яхши эмаслиги туфайли йиқилиб тушди. Айнан шу вазият гол билан якунланганида "Металлург" иккиланмай ҳеч бўлмаса дуранг натижани қайд этган бўларди.

Жарима майдончаси ичида иш чиқмаганидан кейин "Пахтакор" узоқдан зарба беришга ўтди. Биринчи гол ҳам айнан шундай вазиятда урилди. Анча вақтини захира ўриндиғида ўтказиб юбораётган Баҳодир Пардаев учрашувнинг энг яхши футболчиси бўлди. "Пахтакор"нинг оғриқли нуқтаси сифатида Станислав Андреевни кўрсатиш мумкин. 90+1 дақиқада футболчи 100 % имкониятни кўкка совурди. "Металлург"ни қарши ҳужуми эса жарима зарбаси билан тугади ва Тошматов "16"ни ёнидан гол уришда қийинчиликка учрамади.

Ўйинга оид яна бир эътирофга Зафар Сафоев муносиб. Жорий мавсумда дебют ўйинини ўтказган дарвозабон биринчи ўйинида, жиддий рақиб олдида ўзини йўқотиб қўйгани йўқ. Дарвозаси тўридан ўрин олган иккита тўпда ҳам унинг айби бўлмади. Икки бўлимда ҳам "Металлург"ни қийин вазиятлардан олиб чиқиб кета олди. Қолганини суратлар орқали томоша қилинг.

- Тўплар бор, янгисидан, ўйналмаган, тепилмаганидан бор! Келиштириб берамиз...

- Оғайни, илтимос тепиб қўймагин. Ўзи ҳозиргина сотиб олдим...

Тўп тепиш мумкин бўлмаса нима қиламиз? Кел яхшиси кураш тушамиз. Демак, майдонда грузиялик полвон, ўзбек полвонига қарши...

Нодирхўжа Юлдашев

Бекободдан фотомақола