Хабарингиз бор, "шерлар" тарбияланувчиси "Брентфорд"га ижарага берилди ва у 30 юинга қадар ушбу жамоа шарафини ҳимоя қилади. Биз 18 ёшли футболчи билан боғландик ва ўзимизни қизиқтирган саволларга жавоб олдик.

- АПЛга йўл олган биринчи ўзбекистонлик футболчи сифатида нималарни ҳис қиляпсиз?

- Авваламбор, Ассалому алайкум! Мени қўллаб-қувватлаётган бутун Ўзбекистон халқига катта раҳмат айтаман. Жуда кўплаб хабарлар ва илиқ фикрларни қабул қилиб оляпман. Худо хоҳласа, ўзимни кўрсатиб, ўзбек футболчиси нималарга қодирлигини кўрсатишга ҳаракат қиламан.

- Бу таклиф қаердан пайдо бўлди? "Брентфорд" сиз ҳақингизда қандай фикрда?

- "Брентфорд" жамоаси вакиллари мени ёздан бери терма жамоадаги ўйинларим орқали кузатиб бораётган экан. Бу ҳақда менинг манфаатларимни ҳимоя қилувчи агентлигим айтганди. Ушбу хабарни эшитгач, ўз устимда янада кўпроқ ишлашга ҳаракат қилдим. Мана натижасини кўриб турибсизлар.

- Ўтишнинг молиявий шартлари қанақа бўлди?

- Молиявий шартлари аъло даражада. Барчаси мени қониқтирди.

- "Брентфорд"даги муҳит ҳақида нималар дея оласиз? Жамоа машғулотларига қўшилдингизми?

- Ҳа, машғулотларги қўшилдим. Ҳаммаси ўйлаганимдан ҳам яхшироқ кўринмоқда. Бу ерда ўз ишининг усталари йиғилган. Тартиб-интизом биринчи ўринда туради ва ҳамманинг ишга ёндашуви жуда профессионал. Бу менга жуда ёқди.

- Биламизки, "Брентфорд Б"да Дэвид Бекхэмнинг ўғли, ҳужумчи Ромео Бекхэм ўйнайди. У билан танишиб олдингизми?

- Ҳа, Ромео Бекхэм билан яқин дўст бўлиб олдик. Унга Ўзбекистонни таништирдим ва ўзбек тилини ўргатяпман. Унинг оиласини Ўзбекистонга таклиф қилдим. Ромео жуда яхши йигит. У албатта отаси, Дэвид Бекхэм билан Ўзбекистонга келишини айтди.

- Муҳаммадали, самимий суҳбат учун раҳмат! Англия клубидаги фаолиятингизда омад тилаймиз!

- Раҳмат!

"Бекхэмга Ўзбекистонни таништирдим". АПЛга йўл олган Муҳаммадали Ўринбоев билан эксклюзив интервью!