Эроннинг "Персеполис" клуби устози Бранко Иванкович жамоасининг мағлубиятига бош ҳакамни айбдор қилиб кўрсатди. Маълумки, кеча Японияда ўтказилган ОЧЛ финали биринчи учрашувида "Кашима Антлерс" 2:0 ҳисобида ғалаба қозонди.

Бранко Иванкович шундай деди: "Аввало "Кашима Антлерс"ни ғалаба билан табриклайман. Лекин ҳакамлик яхши бўлганида биз ютган бўлардик. Биринчи таймда рақиб футболчиси бизнинг ҳужумни яққол бузди ва унга қизил карточка берилиши лозим эди. Аммо хитойлик ҳакам миқ этмади. Ўйлайманки, ҳакамлик савияси финалга хос бўлмади. У кўпинча бизга қарши қарорлар қабул қилди. Хуллас, ҳамма айб ҳакамда. Вазият қийин, лекин жавоб учрашувида мағлубият фарқини йўққа чиқариб ғалаба қозонишни хоҳлаймиз. Жавоб баҳсида бизни 80 минг мухлис қўллаб туради. Бу эса катта устунлик беради".

Эслатиб ўтамиз, ОЧЛ финалидан ўрин олган иккинчи ўйин 10 ноябрь куни Теҳрондаги машҳур "Озоди" стадионида бўлиб ўтади.

Бранко Иванкович: "Ҳамма айб ҳакамда"