"Бухоро" футбол клуби қишки трансферлар мавсумида истеъдодли футболчиларни жалб қилиш билан бир қаторда ўтган мавсумдаги муваффақиятли таркибни сақлаб қолишга ҳам катта эътибор қаратади.

2024 йилги мавсумда Про Лига чемпионатида "Бухоро" жамоасининг совриндорлар сафидан жой эгаллаши учун катта ҳисса қўшган ҳимоячиларимиз Фране Икич ва Марко Колакович билан шартнома яна бир йилга узайтирилди. Клуб раҳбариятининг олиб борган музокаралари натижасида 31 ва 32 ёшли футболчиларимиз келаси мавсумда ҳам "Бухоро" шарафини ҳимоя қилади.

Фране Икич ўтган мавсумда Про Лигада "Бухоро" сафида 25 та ўйинда иштирок этиб, 4 та гол урди, Марко Колакович 26 та ўйинда иштирок этиб 7 марта рақиб дарвозасини ишғол этди.

Клуб раҳбарияти Фране Икичнинг ҳамда Марко Колаковичнинг тажрибаси ва маҳорати келаси мавсумда ҳам янги марраларни забт этишда, ҳал қилувчи паллаларда ишончли ўйин кўрсатиб, жамоанинг ғалабалари ва ютуқларини мустаҳкамлашда муҳим роль ўйнашига ишонч билдиради", — дейилади клуб хабарида.

"Бухоро" икки легионер билан шартномани узайтирди