Улуғбек Бакаев бошқарган жамоалар одатда доим юқори ўринлар учун курашиб келган. "Бухоро" ҳам бу мавсумда катта марраларни забт этишга ҳозирлик олиб бормоқда. Анталияда давом этаётган машғулотлар, назорат учрашувлари бу борада тайёргарликни янада маромига етказиши турган гап. Жамоанинг сербиялик ҳимоячиси Марко Колакович бу борада фикрларини билдирди.

"Тайёргарлик жуда аъло даражада олиб борилмоқда. Қувонарлиси бу ерда машғулотлар учун ҳамма шароит яратилган. Тикланиш учун ҳам қулай. Бундан ташқари сифатли жамоалар билан назорат учрашувлари ўтказмоқдамиз. Шу ўринда клуб раҳбариятига яратиб берилган шароит ва ишонч учун раҳмат айтаман.

Янги келган футболчилар тезда мослашиб кетишди, чунки улар Бакаевнинг талабларини жуда яхши билишади. Аксарияти аввал унинг қўл остида тўп тепган. Бакаев бошқарган жамоаларда кайфият ва ички муҳит юқори чўққида бўлган. Бу нарса мослашишда ёрдам беради.

Мақсадимиз кўпроқ очко жамғариш ва юқори ўринларни эгаллаш. Афсуски, ўз майдонимизда ўйнамаймиз. Бухоро шаҳри, халқи ўз уйида рақибларни қабул қилишни истайди. Тўғрисини айтганда қуръа оддий келгани йўқ. ОКМКнинг кучли томонларини биламиз, Суперлиганинг етакчи жамоаларидан бири. Лекин бу бизни икки ҳисса куч билан ўйнашга ундайди",- дейди Колакович.

Марко Колакович: "Янги мавсумда "Бухоро" билан юқори ўринларни кўзлаганмиз"