Ёдингизда бўлса, 6 сентябрь куни мазкур турнинг 6 ўйини ВАР тизими ишлаши ҳақида хабар берилганди. 1 кундан кейин эса давлат тадбирлари билан боғлиқ сабаблар туфайли режада ўзгариш бўлиши айтилди. Ниҳоят, бугун "Қизилқум" — "Олимпик" ҳамда "Сўғдиёна" — "Навбаҳор" баҳсларида ВАР ишлаши маълум қилинди.

Ҳолат юзасидан ЎзФҲМ матбуот хизматидан изоҳ сўрадик. М. Саримсоқовнинг таъкидлашича, 18-тур баҳсларининг ҳеч бирига давлат тадбирлари туфайли КТС юборилмайди. Навоий ва Жиззахдаги ўйинларда эса марказ томонидан шундай ҳолатлар учун харид қилинган янги технология ишлайди.

Унинг ягона камчилиги ВАР томонидан ўрганиладиган вазиятлар (офсайд чизиғи, гол ҳисобга олиш ёки олмаслик, пенальти ёки қизил карточка билан боғлиқ ҳолатлар)ни телетрансляцияга чиқариб бера олмаслиги мумкин. Бошқа ҳеч қандай муаммо йўқлиги айтилди. Яъни, ўйин вақтида бош ҳакам ва ВАР ҳаками ўртасида мулоқот бўлади, вазиятлар муаммосиз кўриб чиқилади. Фақатгина, юқорида қайд этилганидек, ВАР томонидан ўрганилаётган жараён телеэкранларда кўринмаслиги мумкин.

Маълумот ўрнида 17-тур доирасидаги "Навбаҳор" — "Пахтакор" ўйинида ҳам айнан шу қурилмадан фойдаланилган.

Coca Cola Суперлига. Фақат Навоий ва Жиззахда ВАРдан фойдаланилади