Испаниялик мутахассис Хосе Мария Мендез бошчилигидаги футзалчиларимиз айниқса, колумбияликларга қарши кечган гуруҳ босқичининг 2-тур учрашувида ажойиб ўйин кўрсатишди. Биз терма жамоамизга мундиаллардаги илк очкони тақдим этган ушбу баҳсдан сўнг тажрибали футзалчимиз Дилшод Ирсалиевдан интервью олдик.

- Жаҳон чемпионатини узоқ вақт кутган эдинглар. Мана, ниҳоят, мундиалда қатнашиш насиб этди. Таассуротлар қандай?

- Кайфиятлар аъло даражада. Дарҳақиқат, жаҳон чемпионатида иштирок этишни узоқ вақт кутгандик. Шахсий фикрим, биринчи иштирок учун ёмон натижа қайд этмадик. Тўғри, дастлабки ўйинда ҳаяжон яққол кўзга ташланиб қолди. Аэропортдан тушган заҳотимиз жаҳон чемпионати шукуҳи бизни қамраб олди. Кали шаҳри кўчалари, меҳмонхона, арена, машғулот залларида ҳам Колумбия нуфузли мусобақага мезбонлик қилаётгани шундоққина сезилиб турибди.

- Осиё чемпионати билан солиштирганда, фарқ бўлса керак?

- Албатта, бор. Бу биринчи галда ташкилотчилик масалаларида кўзга ташланади. Ушбу гапим билан февраль ойида пойтахтимизда ўтказилган Осиё чемпионати ташкилотчилигини назарда тутмаяпман. Мутахассислар ҳам, меҳмонлар ҳам, Тошкент шаҳрида бўлиб ўтган қитъа биринчилигини мусобақалар тарихидаги энг яхшиси сифатида баҳолашганди. Шунчаки, жаҳон чемпионати ФИФА томонидан ташкил этилади. Ундаги иштирокчилар сони ҳам кўп бўлади. Жамоалар савияси ҳам умуман бошқа, энг муҳими, унинг ҳаяжони ўзгача. Айнан мана шу ҳаяжон бизга илк учрашувда панд бериб қўйди.

- Биринчи ўйинда Панама термасига ютқаздинглар. Очиғи, бунга лойиқ эмасдинглар, тўғрими?

- Ўз хатоларимиз эвазига аламли мағлубиятга учрадик. Ўйин мобайнида юзага келтирилган кўплаб қулай вазиятлардан фойдалана олмадик. Жуда қўпол хатоларга йўл қўйдик. Оқибатда, панамалик футзалчилар бизни жазолашди. Колумбия термасига қарши кечган баҳсдан кейин ўша камчиликлар ва аламли мағлубиятни ўйласам, юрагим орқага тортиб кетяпти. Агар Панама термаси устидан зафар қучганимизда, ҳозир нимчорак финал ҳақида ўйлаётган, сиз билан шу мавзуда суҳбатлашаётган бўлармидик...

- Панамаликларга қарши ўйиндан сўнг мураббийлар нима дейишди? Учрашув муҳокама қилиндими?

- Ўйинни таҳлил қилдик. Мураббийлар ҳам хатоларимиз эвазига мағлубиятга учраганимиз, агар ўз ўйинимизни қилганимизда, 3-4та тўп фарқи билан ғалаба қозонишимиз мумкинлигини билдиришди. Шу билан бирга, тушкунликка тушмасликка, мағлубиятни имкон қадар тезроқ унутиб, кейинги ўйинга кўнгилдагидек тайёргарлик кўришимиз кераклигини уқтиришди. Бундай мағлубиятлар учраб туради. Керакли хулосаларни чиқардик.

- Панама термасини менсимаслик ҳолати кузатилмадими?

- Йўқ, чунки бу кўпчилик ўйлагандек кучсиз жамоа эмас. Ўз минтақасининг саралаш баҳсларида муваффақиятли иштирок этиб, жаҳон чемпионати йўлланмасини қўлга киритган. Лекин гуруҳдаги бошқа рақибларимизга нисбатан бу терма ҳақида маълумотлар деярли йўқ эди. Колумбия ва Португалия термаларини ўрганиш осонроқ кечганди.

- Колумбия термаси билан ижобий натижа қайд этилишини кўпчилик кутмаганди. Мезбонларнинг португалларга қарши кечган ўйинини кузата туриб, бироз хавотир ҳам йўқ эмасди. Айтинг-чи, ижобий натижанинг асосий омили нимада бўлди?

- Биринчи галда рақибдан чўчимаган ҳолда майдонга тушдик, ўзимизга бўлган ишонч юқори эди. Худди финал учрашувида ўйнаётгандек ҳаракат қилдик. Барчамиз ягона мақсад сари интилдик. Натижа ҳам шунга яраша бўлди. Менимча, мезбонлар биздан бундай шиддатни кутишмаганди. Ушбу омил бизнинг фойдамизга ишлагани аниқ. Биринчи бўлимнинг ўзида иккита гол урдик, яна кўплаб имкониятлар яратдик. Ўз навбатида, мезбонлар ҳам кўплаб хавфли вазиятларни юзага келтиришди. Шуни алоҳида айтишим керак, шу куни Рустам Умаров ажойиб тарзда ҳаракат қилди. Унинг ишончли ўйини ва кўплаб «сейв»лари жамоамизни муқаррар голлардан қутқариб қолди. Лекин юқорида айтганимдек, ғалабани ушлаб қололмадик. Умуман олганда, дуранг ҳам ёмон натижа эмас.

- Жаҳон чемпионати олдидан жароҳатингиз бор эди. Мундиалда бу ўз таъсирини ўтказмадими?

- Йўқ. Ҳаммаси жойида. Жароҳатимдан фориғ бўлганман. Июль-август ойларида жисмоний ҳолатим бироз талаб даражасида эмасди. Лекин мундиал олдидан аввалги спорт формамини тиклаб олдим.

Дилшод Ирсалиев: «Дебютантлик ҳаяжони панд берди»