"Локомотив" билан хайрлашган ярим ҳимоячи Дилшод Жўраев янги мавсумда "Хоразм" либосида ҳаракат қилади. Футболчи янги жамоасига ўтиши ҳақида фикрлари билан ўртоқлашди.

- "Хоразм"га ўтишимга келсак, бош мураббий Ҳаким Фузайлов ва директор Рўзимбой Аҳмедовнинг таклифидан сўнг бу жамоада ўйнаш истаги туғилди. Очиғини айтганда жамоамизнинг Суперлигада ўйнашига охиригача ишондик. "Олимпик" рад жавоб бергач навбат бизга келганди. ПФЛ ўзининг принципларига содиқ қолишига ишондик. Иккинчи томондан клуб раҳбарлари, ҳомийлари қўллаб-қувватлади. Ўйлайманки, "Хоразм"нинг Суперлигада ўйнаши барчага қизиқ, чунки жамоа узоқ танаффусдан сўнг Суперлигада ўйнайди. Ҳаким Фузайлов қўл остида яхши жамоа шаклланмоқда. Суперлига жамоаларига муносиб қаршилик кўрсата оламиз. Барибир биринчи йил осон бўлмайди. Шунга яраша тайёргарлик кўряпмиз.

- Қуръа "Хоразм" учун яхши рақибларни берди. Лекин барибир ҳамма рақиб билан ўйнаймиз. Ёқимли томони шуки, илк турни "Дўстлик" стадионида мезбон сифатида ўтказамиз. Ўз майдонимиз тезроқ битишини ва мухлисларимиз олдида тўп тепишимизни интизорлик билан кутиб қоламиз. Футбол мухлислар учун. Яхши натижалар билан ишқибозларимизни хурсанд қилиш учун боримизни берамиз.

Абдулазиз Искандаров ёзиб олди

Дилшод Жўраев: "Хоразм"нинг Суперлигада ўйнашига охиригача ишонгандик"