Душан фаолияти давомида илк бор Сербия клубида ўйнамоқда. Ҳужумчи Сербиянинг "Земун" жамоаси билан йил бошида шартнома тузган. Биз Душан билан боғланиб "Пахтакор"даги дамлари ва фаолияти борасида суҳбатлашдик.

- Душан аввалам бор ассалому алейкум.

- Ваалейкум ассалом.

- Душан "Пахтакор" ҳақидаги янгиликларни, собиқ жамоангиз иштирокидаги ўйинларни кузатиб боряпсизми?

- Мен ҳар доим "Пахтакор"ни кузатиб бораман. Лекин сўнгги пайтларда бироз вақтим тиғиз бўлгани учун камроқ эътибор беряпман.

- "Пахтакор" жамоасида ўтказган дамларингизни қандай ёдга оласиз?

- Мен ўзимни "Пахтакор" таркибида жуда ҳам бахтли ҳис қилганман. Фаолиятимда "шерлар" билан бироз кўпроқ вақт қолмаганимдан афсусдаман. Бор йўғи 4 ой "пахтакор" жамоаси сафида тўп тепганман. Мен "Пахтакор" ва пойтахтингиз Тошкент шаҳрини ҳеч қачон унутмайман. Мана шундай бой тарихга эга жамоа сафида фаолият олиб борганимдан хурсандман. У ерда барча нарса мени қониқтирган. Жамоа таркибида яхши ўйинларнимни ўтказганман, рақиблар дарвозасига голлар урганман. Мен "Пахтакор" таркибида кўпроқ вақт ушланиб қолишни хоҳлагандим, афсуски бундай бўлишини тақдир истамади.

- Агарда сизга Ўзбекистон жамоаларидан таклиф бўлса, чорловни қабул қиласизми?

- Агарда яхши таклиф бўлса, нима учун қабул қилмаслигим керак? Ўзбекистонда кўпроқ техникага таянилган футбол ўйнашади. Бу эса менга ёқади. Мен Сербия чемпионатида иштирок этувчи "Земун" жамоаси билан ёзгача шартнома имзоладим. Фаолиятим давомида биринчи маротаба Сербия супер лигасида иштирок этаяпман. Орадан 14 йил ўтгандан сўнг ватанимга қайтдим.

- Юқорида яхши таклиф бўлса Ўзбекистонга қайтишим мумкин, дея фикр билдирдингиз. "Локомотив" ёки "Бунёдкор" сизни чорласа иккиланмасдан Тошкентга ташриф буюрасизми?

- Агарда Ўзбекистон чемпионати грандларидан чорлов бўлса жуда ҳам хурсанд бўлардим. Лекин, кўпроқ "Пахтакор"га қайтишни истайман.

- Айни дамда "Пахтакор" жамоасини Шота Арвеладзе бошқармоқда. Бундан хабарингиз бўлса керак?

- Албатта, хабарим бор. Шота Арвеладзе ажойиб футболчи бўлган. Ҳозирги кунда жуда ҳам яхши мутахассислардан бири.

- Сиз "шерлар билан ОЧЛ мусобақасида иштирок этгансиз. "Пахтакор" бу йилги ОЧЛ мусобақасини "плей-офф" босқичида тарк этди. Бундан ҳам хабарингиз бўлса керак?

- Мен собиқ жамоамни гуруҳ босқичига чиқа олмаганини сиздан эшитяпман. "Пахтакор" Осиёнинг энг кучли жамоаларидан бири. Бу йилги ОЧЛ мусобақаси гуруҳ босқичига чиқа олмагани мен учун ёмон ҳолат. Аммо бу футбол. Футболда ҳамма нарса бўлиши мумкин.

- Ҳозир ҳам аввалги даражангиздек футбол ўйнай оласизми?

- Албатта, ўйнай оламан. Айни дамда 32 ёшдаман. Бу шунчаки рақамлар. Лекин ўзимни жуда ҳам яхши ҳис қиляпман.

- "Пахтакор"дан кетганингиздан сўнг, Ўзбекистоннинг бошқа жамоаларидан таклифлар бўлганми?

- Жиддий таклиф бўлганини эслай олмайман. "Пахтакор"ни тарк этганимдан сўнг Украина чемпионатида ўйнадим, ундан сўнг Қозоғистондан яхши таклиф бўлди.

ДУШАН САВИЧ ҲАҚИДА ҚИСҚАЧА МАЪЛУМОТ

Туғилган йили - 1985 йил 1 октябрь

Фуқаролиги - Македония, Сербия

Бўйи - 177 см

Вазни - 69 кг

Позицияси - Ҳужумчи

Ҳозирги клуби - "Земун" (Сербия)

Ўйнаган жамоалари - "Беласица", "Победа", "Вардар", "Работнички", "Брашов", "Инчхон Юнайтед", "Пахтакор" ,"Волинь", "Говерла", "Кайсар", "Славия", "Жетису", "Тобол", "Актобе". Душан Савич айни дамда "Земун" жамоасида фаолият олиб бормоқда.

МИЛЛИЙ ТЕРМА ЖАМОАДАГИ ФАОЛИЯТИ

Македония миллий терма жамоасида 2007 йилдан 2013 йилга қадар фаолият олиб борган

Жаҳонгир Сотволдиев суҳбатлашди

Душан Савич: "Пахтакор"га қайтишни истайман"