Ушбу турда Тошкентнинг "Пахтакор" жамоаси ўз уйида Навоийнинг "Қизилқум" клубини қабул қилди ва 2:1 ҳисобида ғалаба қозонди. Ушбу баҳсдан сўнг "Пахтакор" жамоаси дарвозабони Элдор Суюнов ўз фикрларини билдириб ўтди.

"Қизилқум"га қарши жуда ҳам қийин учрашувни ўтказдик. Яратилган кўплаб имкониятлардан унумли фойдалана олмадик. Рақиб жамоа ҳужум қилиб бизни қийнамади, ўзимиз яратган имкониятларимизни голга айлантира олмаганимиз учун қийналдик. Белгиланган пенальти борасида бирор фикр айта олмайман. Чунки воқеа жуда ҳам тез содир бўлди. Бир тўхтамга келиш учун такрорий вазиятни кўриш керак.

"Қизилқум" бизга қарши ҳимоявий ўйин кўрсатди. Агарда, грузиялик легионер футболчиси майдонга тушганида бизга анча қийинчилик туғдирарди. Кейинги ўйинларда "Қизилқум" яхши натижа кўрсатади, деб ўйлайман. "Пахтакор" ўз уйида очко олиб, сафарда нима учун очко йўқотаётганини билмайман. Ўзимизни келиб олишимиз учун бироз вақт керак, деб ўйлайман. Агарда буни сабабини билганимизда ғалаба қозонардик. Менимча бироз омад келмаяпти", - дейди Элдор Суюнов

Жаҳонгир Сотволдиев ёзиб олди

Элдор Суюнов: "Агарда, "Қизилқум"нинг грузиялик футболчиси майдонга тушганида..."