Хабарингиз бор, бу турда эксперт сифатида таниқли собиқ футболчи Абдумажид Тоировнинг тахминларини эътиборингизга ҳавола қилиб келяпмиз. Бугун Суперлиганинг 6-тур учрашуви доирасида битта учрашув, якшанба ва душанба кунлари эса 2тадан баҳс бўлиб ўтади. Олдинда бизни "Нефтчи" - "Турон" ўртасидаги қарама-қаршилик, "Бунёдкор" - "Насаф" тўқнашуви каби қизиқарли ўйинлар кутмоқда.

"Пахтакор" - "Суғдиёна"

— "Пахтакор" фаворит. "Шерлар" тезликни оширяпти, бу ўйиндан-ўйинга яққол кўзга ташланяпти. Максим Шацких тўғри таркиб ва схемани танлаб олди. Энди буёғига "Пахтакор"ни тўхтатиш жуда қийин бўлади. "Суғдиёна"га янги мураббий билан озгина вақт керак. Бошковичда яхши футболчилар бор, энди тўғри тактика ва таркиб шакллантириш учун бироз вақт керак бўлади.

"Олимпик" - "Бухоро"

—Яхши сифатли ўйин бўлишига шубҳам йўқ. "Бухоро" ёш ва тажриба борасида "Олимпик"дан устун. Лекин "Олимпик"да тезлик ва шижоат бор. Қизиқарли дуэль Жалолиддинов vs Иминов. "Олимпик"нинг ҳужумида хаммаси яхши лекин химояда муаммолар бор. "Бухоро" ҳужумда жуда суст ҳаракат қилмоқда, химояда хам хатоларга йўл қўймоқда. Фузайлов "Бухоро"сининг ўйинлари менда яхши таассурот қолдирди. Фақат озгина омади келмади. Ўйлайманки, Бақоев омадлироқ бўлади. Таркиб яхши ўйин ҳам, демак камчиликлар устидан ишлашга вақт керак бўлади . "Бухоро" юқорироқ жойга муносиб.

"Нефтчи" - "Турон"

—"Нефтчи" шубҳасиз фаворит. Лекин бу "Турон" футболчилари учун яна хам кучли мотивация бўлиб хизмат қилади. Тўғри тактика ва таркиб танланса бўлди. "Нефтчи" ақлли футбол намоиш этмоқда ва турнир жадвалида 1- ўринда кетмоқда. Ақлли футбол деганим, натижа учун ўйнаяпти ва ғалаба учун қанча гол керак бўлса, шунча уряпти. "Нефтчи" ўйин давомида рақибга мослашиб, ўзига керакли бўлган темпни белгилаб боради. Хоҳласа оширади, хоҳласа туширади, темпни. Мураббийнинг имзоси ҳар томонлама кўриниб турибти.

"Бунёдкор" - "Насаф"

—Турнинг безаги. Ўтқазилган 5та ўйинларни 4тасини сафарда (ғалаба) ва 1 та ўйин уйда (дурранг) ўтказди. "Бунёдкор" анчадан бери ўз стадионида ўйнамагани учундир уйда бироз ўзини ноқулай хис килаётгандек кўринмоқда. Лекин ўйин сифати борасида яхши таассурот қолдиряпти. "Насаф" эса самарадорликни оширди ва олдинги креатив ўйнларини намойиш этишни бошлади. Агар "Насаф"нинг ғалабаси бу сюрприз бўлса, демак сюрприз кутса бўлади.

"Энди "Пахтакор"ни тўхтатиш жуда қийин, "Насаф"дан сюрприз кутса бўлади" — Суперлиганинг бугунги ва бошқа ўйинлари олдидан мутахассис фикри