“Бургутлар” кеча ўз майдонида “Динамо”ни қабул қилиб 1:1 ҳисобида дуранг қайд этди. Мезбонларнинг голига муаллифлик қилган Фарҳод Бекмуродов учрашувдан сўнг ўз фикрларини билдириб ўтди. Дарвоқе, мазкур футболчи бу йил 21 ёшга тўлди. Жорий мавсум олий лигада дебютини нишонлади.

- Ўйин ҳақида нима дейиш мумкин. Гарчи бугун ғалаба қозона олмаган бўлсакда, асосийси ўз олдимизга қўйилган вазифани уддаладик. Бундан жуда хурсандмиз. Очиғи, кўпчилик “Андижон”нинг олий лигада қолишига ишонмаганди. Аммо биз мақсад сари астойдил курашдик.

- Тақдирни қарангки, биринчи даврада айнан самарқандликларга қарши кечган баҳсда олий лигадаги дебютимни ўтказгандим. Элитадаги илк голимни ҳам айнан “Динамо” жамоасига киритдим.

- Захирадан майдонга тушаётганимда мураббийлар ўнг қанот ярим ҳимоясида харакат қилишимни айтди. Бунгача майдон марказида ўйнаб келганим учунми ёки бошқа сабабми бошида ўйинга киришиб кетишим қийинроқ кечди. Аммо кейинчалик марказроққа ўтиб ўйнадим. Голимга келсак, Анвар ака Бердиев ҳаводаги курашда тўпни менга ютиб берди ва бундан унумли фойдаланиб қолдим.

- Энди келгуси мавсумдан умидим катта. Асосий таркибга кириш учун бор кучим билан харакат қиламан ва бу орқали олимпия терма жамоасидан ҳам таклиф олишга интиламан.

Исломбек Рустамбеков.

Фарҳод Бекмуродов: “Андижон”ни олий лигада қолишига кўпчилик ишонмаганди”