Бухородаги баҳсни Вадим Агишев бошқариши маълум қилинди. Бу 43 ёшли арбитр учун илк финал.

Тарихга назар солсак, Ўзбекистон кубогининг ортда қолган 29 финалида 17 нафар бош ҳакам ишлаганига гувоҳ бўламиз. Илк финални (1992 йил) бошқариш бахти марҳум Гали Имомовга насиб қилган эди.

Рекорд

Ўзбекистон кубоги финалларида ишлаш борасида мундиал рекордчиси Равшан Эрматовнинг олдига тушадигани йўқ. Унинг ҳисобида 5 та финал бор. Кейинги поғонага 4 тадан ўйин билан Гали Имомов ҳамда Ноил Лутфуллин ёзилган.

Шунингдек, Равшан Эрматов финалларни кетма-кет бошқариш бўйича барчадан олдинда. У 2010-2013 йиллардаги ҳал қилувчи баҳсларнинг ҳаммасини бошқарган.

Хорижлик реферилар

Мамлакат кубогининг ҳал қилувчи ўйинида 2 бор чет эллик ҳакамлар ишлаган эди. Аниқроқ айтсак, 2014 йил якунида ўтган "Локомотив" 1:0 "Бунёдкор" ўйинини Ким Донг Жин (Ж. Корея) бошқарган. 2017 йилда пойтахтнинг яна ўша клублари ўртасида "Бунёдкор" стадионида ўтказилган ва 3 йил олдинги ҳисоб такрорланган баҳсда БАА вакили Муҳаммад Абдулла Ҳасан ишлаган.

Энг қаттиққўл

Финалларда энг кўп сариқ карточка Равшан Эрматовнинг чўнтагидан чиққан (20 марта) бўлса, қизил карточка кўрсатиш борасида Гали Имомов ҳамда Ноил Лутфуллин етакчи бўлган (3 тадан). Аммо пенальти белгилаш бўйича Темур Тўхтасинов барчадан олдинда (2). У 2018 йилнинг 28 октябрь куни Фарғонада ўтказилган АГМК 3:1 "Пахтакор" беллашувида ҳар икки жамоа дарвозаси томон 11 метрли жарима зарбаси белгилаган.

Тўлиқ статистика

	рефери	финал	с-к	қ-к	пен
1	Равшан Эрматов	5	20	1	1
2	Гали Имомов	4	14	3	0
3	Ноил Лутфуллин	4	14	3	0
4	Марат Исмоилов	2	12	2	0
5	Рустам Саидов	2	11	1	0
6	Рашид Айтеков	1	8	0	0
7	Ғайрат Каримов	1	6	0	0
8	Шерзод Қосимов	1	4	0	1
9	Ким Донг Жин	1	3	1	0
10	Муҳаммад Абдулла Ҳасан	1	5	0	0
11	Сардор Нажафалиев	1	4	1	1
12	Дилшод Асимов	1	3	0	0
13	Дмитрий Роман	1	3	0	0
14	Темур Тўхтасинов	1	5	0	2
15	Владислав Цейтлин	1	4	1	0
16	Аҳрол Рисқуллаев	1	4	1	0
17	Зокир Қодиров	1	1	0	1
18	Вадим Агишев	-	-	-	-

Фахриддин Рўзиев тайёрлади

Финал. Эрматов ҳаммадан олдинда