Мутахассис деярли бир хил натижалар билан "Челси"ни "Брайтон"га айлантирди. Поттер сентябрь ойида "Стэмфорд Бриж"даги жамоа бошқарувини Томас Тухелдан қабул қилиб олганди. У "Челси" мураббийи сифатида қийин даврни бошдан кечирди.

47 ёшли мураббий катта маблағ билан қурилган "кўклар"дан яхши натижа чиқаришга уринмоқда. Биргина қишки трансферлар ойнасида Лондон клуби 600 млн фунт сарфлади.

Энди статистикалар шуни кўрсатяптики, Грэм Поттер янги жамоасида ўтган мавсумда "Брайтон"да қайд этган натижаси билан деярли бир хил натижани такрорлади.

"Челси" жорий мавсумда 23 та ўйиндан сўнг Премьер-лигада 10-ўринда бормоқда. Улар 8 та ўйинда ғалаба қозонишди, 7 та ўйин дуранг билан тугади ва 8 ўйинда мағлубият қайд этилди. Жами 23 та гол уриб, худди шунча ўтказиб юбордилар. Турнир якунига 15 ўйин қолганида "Челси" ҳисобида 31 очко мавжуд.

Таққослаш учун, "Брайтон" 2021/22 йилги мавсумда 23 та ўйиндан сўнг 7 та ғалаба, 12 тадуранг ва 4 та мағлубиятга учраганди. 25 та гол уриб, 23 та ўтказиб юборган жамоа бу пайтгача 33 очко тўплаган эди.

Тухель ушбу мавсум аввалида "кўклар"ни 6 та ўйинда майдонга олиб тушди ва 3 та ғалаба, 1 та дуранг ва 2 та мағлубият билан турнир жадвалининг 6-поғонасини банд қилган эди.

"Стэмфорд Бриж" раҳбарияти Грэм Поттерга ишонч билдиришда давом этмоқда.

Грэм Поттер "Челси"ни "Брайтон"га айлантирди