Ушбу баҳс олдидан “Машъал” клуби футболчиси Ғуломҳайдар Ғуломов ўз фикрларини билдирди.

“Ҳар бир учрашувга жиддий тайёргарлик кўриб келганмиз ва бу биз учун одат бўлиб қолган. “Бухоро” жамоасини сафарда мағлубиятга учратгандик. Ўшанда мухлислар жуда ҳам шиддатли баҳс гувоҳи бўлишганди. Ўша ўйинда омад бизга кулиб боққанди. Бизнинг ўйин услубимиз ҳимоявий бўлгани учун тўпни “Бухоро” жамоаси футболчилари кўпроқ назорат қилишганди. Лекин биз қарши ҳужумда ягона голни уриб ғалабани илиб кетгандик. Мақсадимиз ҳам шу эди. Иккинчи даврада “Пахтакор” ва “Бунёдкор” жамоалари билан бўлган учрашувда дуранг натижа қайд этиб рақибларимизни муҳим очколардан маҳрум қилгандик. “Локомотив” клубини кубок баҳсида жавоб учрашувида мағлубиятга учратгандик. Жамоада фамилиялар рол ўйнамайди. Тўп юмалоқ майдон текис. Қайси жамоа ўйинга тўғри тайёргарлик кўрган бўлса ўша жамоа ғалаба қозонади. Бир сўз билан айтганда қизиқарли баҳс бўлади”, - дейди “Машъал” клуби футболчиси Ғуломҳайдар Ғуломов.

Жаҳонгир Сотволдиев

Ғуломҳайдар Ғуломов: “Жамоада фамилиялар рол ўйнамайди”