Душанбенинг "Истиқлол" клуби 2018 йилги мавсумни 21та ўйинда 51 очко тўплаб, чемпионликка эришди. Жамоа охирги беш йилда Тожикистон чемпионлигини ҳеч кимга бермай келмоқда.
Мазкур клуб Осиё чемпионлар лигаси гуруҳ босқичида ҳеч қачон иштирок этмаган. ОФК кубогида эса 2015 ва 2017 йилларда финалга қадар етиб борган.

"Истиқлол" 2018 йил Тожикистон кубоги финалида "Регар-ТадАз" клубини 1:0 ҳисобида мағлуб этиб, еттинчи марта мамлакат кубоги соҳибига айланди. Бу Тожикистон клублари учун мутлоқ рекорд ҳисобланади.

Жамоани айни вақтда ўзбекистонлик футбол мухлисларига яхши таниш Ҳаким Фузайлов бошқармоқда. Ҳаким Қаюмович 2018 йилнинг 3 декабрь куни “Истиқлол” бош мураббийи этиб тайинланган.

Бугунги кунда жамоа юлдузи Эҳсони Паншанбе ҳисобланади. Ёш бўлишига қарамай тезда клубнинг асосий ўйинчисига айланиб олди. 1999 йилда туғилган ярим ҳимоячи 2018 йилда Тожикистоннинг энг яхши футболчиси деб топилгани ҳам бежиз эмас.

Ўтган йил жамоа ҳужумчиси Шериддин Бобоев 12та гол билан Тожикистон чемпионати тўпурари бўлган эди. Эътиборлиси у ҳам 1999 йилда таваллуд топган.

28 ёшли тажрибали ярим ҳимоячи Фатхулло Фатхуллоев 2008 йилдан буён "Истиқлол" клуби шарафини ҳимоя қилиб келмоқда. У 2007 йилдан бери Тожикистон миллий терма жамоаси аъзоси ҳисобланади. Ҳозирга қадар терма жамоа либосида 57та марта майдонга тушиб 9та гол уран.

Айни пайтда "Истиқлол" сафида ўзбекистонлик ҳимоячи Жалил Кимсанов тўп тепмоқда. У "Сўғдиёна", "Қизилқум", "Қўқон-1912" ва "Нефтчи" клубларидаги ўйинлари билан мухлисларга яхши таниш. "Истиқлол"да ўтган йил бошқа бир ҳамюртимиз Жаҳонгир Абдумўминов ўйнаган эди.

"ИСТИҚЛОЛ" (Тожикистон)
Лақаби: "Шерлар"
Ташкил топган сана: 2007 йил, ноябрь ойи
Уй стадиони: Республика Марказий стадиони
Сиғими: 24000 томошабин
Клуб президенти: Шохрух Саидзода
Бош мураббий: Ҳаким Фузайлов
Клуб расмий сайти: fc-istiklol.tj
Техник ҳомий: Joma

Совринлари
Тожикистон чемпиони - 7 марта
Тожикистон кубоги соҳиби - 7 марта
Тожикистон футбол Федерацияси кубоги соҳиби - 4 марта
Тожикистон Суперкубоги соҳиби - 7 марта
ОФК Президенти кубоги соҳиби - 1 марта

"Истиқлол" таркиби:
Дарвозабонлар
1.Рустам Ятимов
22.Никола Стошич
36.Беҳруз Хайриев

Ҳимоячилар
2.Жалил Кимсанов (Ўзбекистон)
3.Табризи Давлатмир
4.Бахтиёр Қаландаров
5.Искандар Жалилов
6.Фируз Караев
19.Аҳтам Назаров
21.Олексей Ларин (Украина)

Ярим ҳимоячилар
7.Михайло Цакич (Сербия)
8.Нуриддин Давронов
10.Алишер Жалилов
11.Муҳаммаджон Раҳимов
13.Нозим Бобожонов
17.Эҳсони Паншанбе
18.Фатхулло Фатхуллоев
20.Амирбек Жўрабоев
70.Шаҳром Сулаймонов

Ҳужумчилар
9.Сулаймон Мухадов (Туркманистон)
14.Шериддин Бобоев
23.Шаҳром Самиев
28.Камрон Турсунов

Ҳаким Фузайлов бошчилигидаги "Истиқлол" ҳақида