Ўйин ҳақида

— Биринчи давранинг сўнгги ва шу сабаб йигитларда чарчоқ бор. "Насаф" билан баҳсдан сўнг тиклана олмадик.

Тезкор голлар режаларимизни бузиб юборди. Тан олиш керак, рақиб бугун ҳар жабҳада устун эди. Бизда ҳам вазиятлар бўлди, аммо олдин айтганимдек, бизга сўнгги нуқтани қўядиган ҳужумчи етишмайди. Уч метрдан уриш керак бўлган вазият ҳам бўлди. Эҳтимол вазиятлардан фойдаланганимизда ҳисоб бошқача бўлиши мумкин эди.

— "Металлург" "Насаф"га қарши ўйинда мудофаада жуда яхши ўйнаганди. Бугунги ўйинда ҳимояда бўлган парокандаликнинг сабаби нимада?

— "Сурхон" ва "Насаф"га қарши баҳсларда ҳимояда ўйнаган ҳолда, қарши ҳужумга чиқишни режа қилгандик ва бу режамиз иш берди. Бугун уч очкони мўлжалланган ҳолда юқорироқ ўйнашни мақсад қилгандик. Аммо, режамиз амалга ошмади. Тикланиш йўқ, чарчоқ бор ва йигитлар концентрацияни йўқотишмоқда.

— "Металлург" ўз тарихида биринчи даврани ғалабасиз якунламаган экан. Мураббийлар штаби ва раҳбариятнинг мавсумнинг қолган қисмига режалари қандай?

— Иккинчи даврага вариантлар бор, аммо тўлиқ аниқлаб олганимиз йўқ. Ўйлашимча, жамоага янги ўйинчилар олинади. Ҳозирда барча эътиборимизни сўнгги учта тур ва Кубоги доираидаги "Сурхон" билан баҳсга қаратганмиз. Шундан сўнг нимадир дейишимиз мумкин.

Илёс Қурбонов: "Жамоага янги ўйинчилар олинади"