- Ўйин жуда кескин ўтди. Ўзига хос дерби мақомидаги ўйин бўлгани учун ҳам учрашувдаги шиддат баланд бўлди. Муҳими ўйинда ғалабага эришдик.
Тўғри ўринбосарлар ўйинларида натижага у қадар эътибор қаратилмас. Лекин у биз учун, майдонга тушганлар учун ўз-ўзига ишонч ҳосил қилиш нуқтаи назаридан бу ўйин жуда муҳимдир. Қолаверса, ёшлар жамоасидаги ўйинлар орқали маҳоратимизни тоблаб боришга ҳаракат қиламиз.

Асосий таркиб? Тўғри ўтган мавсумнинг биринчи даврасида асосий таркибда ҳам ўйнадим. Иккинчи даврада эса жамоамизга кўплаб тажрибали ва иқтидорли ўйинчилар қўшилди. Эндиликда улардан маҳорат сабоқларини олишга ҳаракат қилаяпман. Ўйлайманки, тез орада яна асосий таркибга қайтаман.

Эртанги ўйин ҳақида гапирадиган бўлсак, ўринбосарлар ўртасидаги ўйин шиддати ҳам асосий жамоалар баҳси осон ўтмаслигини кўрсатиб турибди. Бир томондан юқорида айтганимдек, ўзига хос дерби, иккинчи томондан турнир жадвалидаги ёнма-ён ўрин, хуллас барча кўрсаткичлар бизга кескин, муросасиз ва томошабоп ўйинни ваъда қилмоқда.

Қолаверса “Қизилқум” биринчи даврада ўз уйида мағлуб этилганди. Ўзига хос реванш олиш учун ҳам улар жиддий тайёргарлик кўргани аниқ. Лекин нима бўлганда ҳам насиб этса, мухлислар қаршисида ғалабага эришамиз, - дейди Ислом Холиқов.

"Бухоро" матбуот хизмати

Ислом Холиқов: "Барча кўрсаткичлар муросасиз ўйинни “ваъда қилмоқда”