"C" гуруҳидан жой олган Ироқ терма жамоаси ўз майдонида 14 ноябрь куни Эронни, ундан кейин 19 ноябрда Баҳрайнни қабул қилади. Бироқ бу ўйинлар бошқа давлатга кўчирилиши мумкин. Гап шундаки, ФИФА Ироқдаги сиёсий вазиятга ишончсизлик билан қараяпти ва навбатдаги иккита уй учрашувни бехавотир ўтказиш ниятида.

Тақвимда Ироқнинг навбатдаги иккита ўйини Басра шаҳридаги "Басра Халқаро стадиони"да бўлиб ўтиши белгилаб қўйилган, бироқ октябрь ойида Ироқда юз берган намойишдан сўнг ФИФА ўйинни ўтказиш борасида ташвишга тушиб қолди. Ҳозирча Ироқ - Эрон учрашуви мамлакат шимолидаги Арбил шаҳрида ўтказилиши мумкин деган гаплар юрибди. Якуний қарор эса тез орада қабул қилинади.

Ироқ 10 октябрь куни Гонконг билан айнан Басрада ўйнаб 2:0 ҳисобида зафар қучди ва стадионга 32 мингдан зиёд мухлис ташриф буюрди. Турнир жадвалида Ироқ 7 очко билан биринчи, Баҳрайн ҳам 7 очко билан иккинчи, Эрон эса 6 очко тўплаган ҳолда учинчи ўринда боряпти.

ЖЧ-2022 саралаш. Ироқнинг ўз майдонида Эрон ва Баҳрайн билан ўйини сўроқ остида