Ушбу тур ўйинларида содир бўлган қизиқарли воқеалар, натижалар ва маълумотлар ҳақида тўхталиб ўтамиз.

"А" гуруҳи

Мусобақанинг очилиш учрашувида Бразилия ҳамда Боливия терма жамоалари майдонга тушишди. Боливия ФИФА рейтинги бўйича ушбу турнирда иштирок этаётганлар орасида энг сўнгги ўринни эгаллаб турибди ва шак-шубҳасиз ушбу гуруҳ аутсайдери ҳисобланади. Бразилия кутилганидек рақибини катта қийинчиликсиз йирик ҳисобда (3:0) мағлуб этди. "Барселона"да ўзини кўрсата олмаётган Коутиньо дубль қайд этди, учинчи голга Эвертон муаллифлик қилди.

Гуруҳнинг қолган икки вакили Венесуэла ҳамда Перу ўртасидаги баҳсда ҳисоб очилмади. Жамоалар муроса кўчасини танлашди. Шунга қарамасдан жамоалар дарвоза томон 5тадан аниқ зарба беришди, бироқ посбонлар ўз вазифасини аъло даражада бажаришди.

Гуруҳ жадвали

"B" гуруҳи

Ушбу гуруҳдаги илк ўйинда кутилмаган натижа қайд этилди. Турнир фаворитларидан бири Аргентина терма жамоаси Колумбияга 0:2 ҳисобида таслим бўлди. Аввалига жароҳат олган Луис Мурьел ўрнига майдонга тушган Рожер Мартинес ҳисобни очди, 86-дақиқада "Аталанта" тўпурари Дуван Сапата фарқни 2тага етказди. Шу куни Месси, Агуэро, Ди Мария каби юлдузларга эга жамоанинг ўйини умуман қовушмади. Аргентина терма жамоаси бош мураббийи Лионель Скалони ярим ҳимоячиларга жиддийроқ эътироз билдирмаса бўлмайди, чунки бу баҳсда улар кўринмай қолишди.

Парагвай - Қатар учрашувида Осиё шарафини ҳимоя қилаётган жамоа қитъа чемпионидек ўйин кўрсата олди. Парагвай биринчи ва иккинчи бўлим бошларида гол уриб, ҳисобни 2:0 кўринишига келтирди. Қатарликларнинг камбэкини БААдаги Осиё Кубоги юлдузларидан бири Аломез Али бошлаб берди. 68-дақиқада ҳисоб қисқартирилди, 9-дақиқадан сўнг Осиё жамоасининг португалияда туғилган футболчиси Роро (Родриго Рохас) ҳисобни тенглаштирди. Шу тариқа учрашув 2:2 ҳисобида якунига етди.

Гуруҳ жадвали

"C" гуруҳи

Ушбу квартетдаги илк баҳсда Уругвай Эквадор билан беллашди. Учрашув кутилганидек Копа Америкада ғолиб бўлиш бўйича рекордчилар устунлигида ўтди. Минанинг автоголи, Лодейро, Кавани ҳамда Суаресларнинг аниқ зарбаларидан сўнг ўйин 4:0 ҳисобида якунига етди. Уругвай турнирда чемпион бўлишга асосий даъвогарлардан бири эканлигини кўрсатиб қўйди.

Япония - Чили учрашувида ҳар иккала томон ўта хавфли ҳужумлар ташкил қилди, бироқ фақат битта жамоа бу имкониятлардан унумли фойдаланди. Пулгар, Варгас (дубль) ва Санчеснинг голлари ўйин 4:0 ҳисобида чилиликларнинг ғалабаси билан якунланишини таъминлади. Кун чиқар юрт вакиллари бир неча марта гол уришга яқин келишган эди, аммо сўнгги зарбадаги хатоликлар Японияга қимматга тушди.

Гуруҳ жадвали

Рақамлар

Биринчи турнинг 6та учрашувида 17та гол урилди, демак, ҳар бир баҳсга ўртача 2,83та гол тўғри келади. Тўпурарлар пойгасида икки етакчи қолганлардан ажралиб олишган.

Тўпурарлар

1. Филиппе Коутиньо - 2та гол

1. Эдуардо Варгас - 2та гол

Қоидабузарлик бўйича Касемиро турнир етакчиси бўлиб турибди. У Боливияга қарши баҳсда 6 марта қоидани бузди. Кейинги ўринлар Леонел Хустинано (Боливия - 4та) ва Пердо Мигелларга (Қатар - 4та) тегишли.

Биринчи тур учрашувларида 23та сариқ карточка ва 2та қизил карточка кўрсатилди. Четлатилганлар Хосе Кинтеро (Эквадор) ва Луис дель Пино (Венесуэла).

Копа Америка. Якунланган 1-тур ҳақида