Украиналик футболчи Михаил Мудрик "Челси" сафида бироз олдин "Ливерпул"га қарши ўйинда дебют қилди. Михаил 55 чи дақиқада Луис Холлнинг ўрнига майдонга туширилди. Эътиборли томони украиналик гарчи гол урмаган бўлсада, ўзини яхши томонлама кўрсата олди. 35 дақиқа ичида 4 га яқин хавфли вазият яратган Мудрик фойдали ҳаракатлар кўрсаткичи бўйича 92.9 фоиз натижа қайд этди (ўйиндаги энг яхши кўрсаткич).

Матбуот анжуманларида ўзини ўта хотиржам тарзда тутиб келаётган футболчи яшил майдонда ҳам босиқ ва вазмин ҳолда вазиятларни тўғри баҳолай олишини намойиш қилди. Дарио Срна "Михаил ўз позициясида Мбаппе ва Винисиусдан кейин 3 чи футболчи" деганида кўпчилик кулганди, аммо кўриб турганингиздек украиналик "Ливерпул" ҳимоячиларини ростакамига терлашга мажбур қилди. Шубҳам йўқки, Поттер футболчини кейинги ўйинда асосий таркибга киритади. Украин мураббийни шунга "мажбур" қилди. Мудрик бугунги ўйини билан АПЛга яна бир юлдуз ташриф буюргани, у билан энди эҳтиёт бўлиб муомалада бўлишлари кераклиги ҳақида жар солгандек бўлди. Туманли албион ҳимоячилари ва дарвозабонлари 22 ёшли вингернинг ҳаракатларини ўйчан тарзда кузатишган бўлсалар керак. Украиналик футболчилар ичида энг қимматбаҳосига айланган Мудрик, сифат ва совринлар бўйича ҳам энг зўри бўлишни уддалайдими ёки йўқ буни вақт кўрсатади. Ҳозирча тахтни Андрей Шевченкодек даҳо эгаллаб турибди...

Жалолиддин Халилов.

Кутиб олинг АПЛнинг янги юлдузи Михаил Мудрик