Игорь Сергеев

Игорь Сергеев ҳаракат қиладиган “Ал-Дафра” клуби сафарда “Ан-Наср” билан беллашиб, 0:1 ҳисобида имкониятни бой берди. Ўзбекистонлик ҳужумчи “Дафра”нинг сўнгги ўйинида Амирлик чемпионатидаги дебют голини уришга эришганди. Бу сафар у 63-дақиқада ҳакам томонидан огоҳлантирилди.

“Ал-Дафра” турнир жадвалида 11-ўринни эгаллаб турибди. Бу эса хавфли зона дегани. Жамоа Сергеевсиз кечган 1-давра ўйинида ҳам “Ан-Наср”дан енгилганди — 1:2. Энди жамоа навбатдаги турни 1 март куни Азиз Ҳайдаров тўп сурадиган “Ажман” майдонида ўтказади. Шу куни Ҳайдаровнинг зиммасида Сергеевни қўриқлаш вазифаси бўлса ҳам ажабланмаймиз.

Азиз Ҳайдаров

Лига дебютанти мақомини сақлаб турган “Ажман” мазкур турда сўнгги ўринни эгаллаб турган жамоа майдонида дуранг ўйнади. Шу тариқа клуб юқорига кўтарила олмади. Бироқ ўз позициясига янада мустаҳкамроқ жойлашди.

Ажманликлар “Эмирейтес” клубига қарши илк давра ўйинида 3:2 ҳисобида устун келганди. Ҳар икки ўйинда ҳам Ҳайдаров тўлиқ ўйнади. Юқорида айтилгани каби жамоа навбатдаги турда Сергеев тўп сураётган клубни қабул қилади.

Отабек Шукуров

Яқиндагина “Бунёдкор”га қарши ўртоқлик ўйини ўтказиб, 1:3 ҳисобида имкониятни бой берган “Шаржа” клуби, чемпионатнинг 17-турида сенсацион натижа қайд этди. Мавсумни мағлубиятсиз ўтказаётган “Ал-Айн” футболчиларининг мағлуб этилиши маҳаллий ОАВ томонидан катта шов-шув билан қарши олинди.

Умар Абдулраҳмон 15-дақиқада ҳисобни тенглаштиргач, барчаси жойига тушиши керакдек эди. Бироқ Шукуров жамоадошлари кейин яна 2 та гол уриб, 3 очкони қўлга киритди. Амирлик чемпионатида юзага келган танаффус “Шаржа” фойдасига ишлагани кўриниб турибди. “Ал-Айн” эса Чемпионлар Лигасида ҳам жавлон уриб, кўринишидан бироз толиққан. Ёки юлдузли таркиб шунчаки рақибини менсимай ҳаракат қилган.

“Шаржа” 6-ўринга кўтарилди. Навбатдаги юриш жамоани “Ал-Жазира” билан тенглаштириши ҳам мумкин. Бунинг учун яхши имконият бор. Зеро “Шаржа” келаси турни аутсайдер — “Эмирейтес” майдонида ўтказади. Сўнгги 6 та ўйиннинг 4 тасида зафар қучган “Шаржа” 1-даврада ҳам “Ал-Айн” билан тенг беллашиб, 3:3 ҳисобида дуранг ўйнаганди.

Championat.asia статистикаси

Амирлик чемпионатида тўп сураётган ўзбекистонликлар деярли ҳар ўйинда 90 дақиқадан тўп тепмоқда. Миллий терманинг Сенегал ва Марокашга қарши ўйинларига эса фақатгина Отабек Шукуров жалб қилинди, у ҳозир яхши формада. Азиз Ҳайдаров ва Сервер Жепаровни Кападзе безовта қилишни истамади. Сергеев эса термага қайтиши учун унга муносиб эканини яна бир карра исботлаб бериши шарт. Балки бунинг учун у жамоасини ҳам алмаштириши керак бўлар...

ЛегионерУз. Амирлик чемпионатида сенсацион натижа: Отабек Шукуров жамоаси пешқадам “Ал-Айн”ни таслим қилди