Ўйин ҳақида

— Бугун ўз майдонимизда ўтказган охирги учрашувимиз эди. Шу боис бугун ғалаба қозониб, муваффақиятимизни Бекобод аҳлига совға қилмоқчи эдик. Афсуски, охир-оқибат имкониятни бой бердик. Шунга қарамай, иккала бўлимда ҳам шогирдларим юқори даражада ўйин намойиш этди.

— Ёмғирли об-ҳаво ўйинга таъсир ўтказдими?

— Албатта, ёмғир учрашувга таъсир ўтказмай қолмади. Бу майдон ҳолатида ҳам сезилди. Шунга қарамай, биз 6-7 та голли вазиятлар яратдик. Учрашув охиригача курашиб, марказ ва қанотлар орқали комбинациялар ҳосил қилишга ҳаракат қилдик. Шогирдларим ўзининг бор имкониятини ишга солди деб ўйлайман.

— Бугунги баҳсда иштирок эта олмаган Худойшукур Сатторовнинг ўрни билиндими?

— Жамоадаги ҳар бир ўйинчининг ўрни бор. Улар ҳар бир ғалабага ўз ҳиссасини қўшмоқда. Сатторов, Тошқўзиев ва бошқа йўқотишлар бўлмаганида бундан ҳам яхшироқ ўйин намойиш эта олардик. Бироқ бугун мавжуд имкониятлардан максимал фойдаланишга ҳаракат қилдик. Афсуски, рақиб жамоа яратган имкониятдан сўнг ўз дарвозамиздан тўп ўтказиб юбордик.

— Қайси жамоани чемпионликка ҳақли деб ҳисоблайсиз?

— Ҳозирда ғолиблик учун курашаётган уч клуб ҳам чемпионликка лойиқ. Лекин "Насаф" ўз уйида мағлуб бўлганини эшитиб, бироз ҳайрон бўлдим. Қайси жамоа чемпион бўлишини эмас, футбол чемпион бўлишини хоҳлайман.

Луисма Эрнандес: "Футбол чемпион бўлишини хоҳлайман"