O'yin haqida

- Bugun o'z maydonimizda o'tkazgan oxirgi uchrashuvimiz edi. Shu bois bugun g'alaba qozonib, muvaffaqiyatimizni Bekobod ahliga sovg'a qilmoqchi edik. Afsuski, oxir-oqibat imkoniyatni boy berdik. Shunga qaramay, ikkala bo'limda ham shogirdlarim yuqori darajada o'yin namoyish etdi.

- Yomg'irli ob-havo o'yinga tasir o'tkazdimi?

- Albatta, yomg'ir uchrashuvga tasir o'tkazmay qolmadi. Bu maydon holatida ham sezildi. Shunga qaramay, biz 6-7 ta golli vaziyatlar yaratdik. Uchrashuv oxirigacha kurashib, markaz va qanotlar orqali kombinaciyalar hosil qilishga harakat qildik. Shogirdlarim o'zining bor imkoniyatini ishga soldi deb o'ylayman.

- Bugungi bahsda ishtirok eta olmagan Xudoyshukur Sattorovning o'rni bilindimi?

- Jamoadagi har bir o'yinchining o'rni bor. Ular har bir g'alabaga o'z hissasini qo'shmoqda. Sattorov, Toshqo'ziev va boshqa yo'qotishlar bo'lmaganida bundan ham yaxshiroq o'yin namoyish eta olardik. Biroq bugun mavjud imkoniyatlardan maksimal foydalanishga harakat qildik. Afsuski, raqib jamoa yaratgan imkoniyatdan so'ng o'z darvozamizdan to'p o'tkazib yubordik.

- Qaysi jamoani chempionlikka haqli deb hisoblaysiz?

- Hozirda g'oliblik uchun kurashayotgan uch klub ham chempionlikka loyiq. Lekin "Nasaf" o'z uyida mag'lub bo'lganini eshitib, biroz hayron bo'ldim. Qaysi jamoa chempion bo'lishini emas, futbol chempion bo'lishini xohlayman.

Luisma Ernandes: "Futbol chempion bo'lishini xohlayman"