Бугунга келиб қитъа чемпионати финал босқичига чиққан бешта терма жамоа номи маълум бўлган. Мезбон Камерун автоматик равишда Африка кубогида иштирок этади. Сенегал, Тунис, Миср ва Мадагаскар терма жамоалари саралаш баҳслари тугамай туриб йўлланмани нақд қилишди.

Йўлланмага эга чиққанлар орасида Мадагаскар терма жамоаси ҳам бор. Ушбу юрт ўз тарихида илк бор Африка кубогига йўлланмани қўлга киритди.

ФИФА рейтингида 106-ўринда бораётган Мадагаскар саралашнинг "A" гуруҳида Сенегал, Экваториал Гвинея ва Судан билан куч синашмоқда. Даслабки 3та турда 7 очко жамғарган оролликлар 16 октябрь куни ўз уйида Экваториал Гвинеяни 1:0 ҳисобида мағлуб этиб учун тарихий ғалабани қўлга киритди. Маълумот учун, Мадагаскар Африка қитъасига яқин жойлашган орол мамлакат ҳисобланади.

Ушбу гуруҳдаги сўнгги 2 тур фақат расмиятчилик учун ўтказилади.

Эслатиб ўтамиз, 2019 йилги Африка миллатар кубоги 15 июндан 13 июлга қадар Камерун мамлакатида бўлиб ўтади. Унда тарихида илк бор 24та терма жамоа иштирок этади.

Мадагаскар биринчи марта Африка кубогида ўйнайди