Баъзи ОАВларда Маъруф Муродовнинг “Сўғдиёна” жамоаси билан амалдаги шартномаси борли ва ушбу шартнома тугамасдан у “Нефтчи” жамоаси билан шартнома имзолаганлиги ҳақидаги хабарлар янграганди. Шунингдек футболчи ПФЛ томонидан 6 ойга дисквалификация қилиниш мумкинлиги ҳам айтилганди. Биз бу вазиятларга аниқлик киритиш мақсадида футболчининг ўзи билан суҳбатлашдик.

- “Сўғдиёна” билан қанча муддатга шартнома тузилган эди?
- Менинг “Сўғдиёна” жамоаси билан тузган шартномам 31 декабрь 2013 йилгача булган муддатга тузилган эди. Шартнома муддати тугагандан сўнг “Нефтчи” жамоаси билан шартнома тузишга қарор қилдим.

- Яқинда “Нефтчи” жамоаси билан шартнома имзоладингиз?
- Ҳа, шундай. Лекин баъзи сайтларда мен ҳақимда чиққан хабарларни ортида кимлар турганига тушуна олмаяпман. Нима кераги бор ёлғон ва асоссиз хабарлар билан одамларни чалғитиб? Яна бир бор қайтариб айтаман: менинг “Сўғдиёна” жамоаси билан тузган шартномам 31 декабр 2013 йилда якунига етган ва мен янги йилда “Нефтчи” билан шартнома имзоладим.

- “Сўғдиёна”ҳақида қандай фикрдасиз?
- Жамоада барчамиз бир оиладек иноқ эдик. Жиззахда ўтказган вақтларимдан мамнунман. Собиқ жамоадошларимга ушбу мавсумда омад тилаб қоламан.

Умид Раимжанов суҳбатлашди.
“Сўғдиёна” ПФК матбуот котиби

Маъруф Муродов: "Сўғдиёна"га омад тилайман"