2020 йил якунларига кўра, "Ўзбекистоннинг энг яхши футболчиси" деб топилган Жалолиддин Машарипов Саудия Арабистонига йўл олиши кутилганди. Сайтимизда у ҳатто тиббий кўрикдан ўтди, тез орада "Ал Насср" билан шартнома имзолайди деган хабар ҳам чиқди.

Бироқ нимадир бўлди-ю, ушбу трансфер амалга ошмади. Бизга маълум бўлишича, Саудия Арабистонининг "Ал Насср" клубига тақиқ қўйилган ва ҳеч қайси футболчини трансфер қила олмас эмиш. Лекин бу қанчалик тўғри ёки нотўғри буниси қоронғу.

Бугун "Жалолиддин Машариповнинг Саудия Арабистони клуби билан шартнома имзоламагани..." сарлавҳали сўровнома якунларига тўхталиб ўтамиз. Ўтган вақт мобайнида мазкур сўровномада 10 мингдан зиёд ўқувчи иштирок этиб, энг кўп 41 фоиз иштирокчи "Яхши бўлди, энди Европага кетади" деган вариантда тўхталган.

28 фоиз ўқувчи "Ёмон бўлди, энди легионер бўла олмаса керак" деган вариантни танлаган ҳамда 24 фоиз иштирокчига "Яхши бўлди, яна "Пахтакор"га қайтади" варианти маъқул келган. Фақат 7 фоиз ўқувчигина "Ёмон бўлди, "Ал Насср" кучли клуб эди" деган вариантга тўхталган.

Сўровнома якунлари ҳақида нима дейиш мумкин? Аввало шуни айтиш керак, Саудия Арабистони чемпионати Осиёда етакчилар қаторида туради ва уларнинг чемпионатини Қатар ёки БАА лигалари билан солиштириш керак эмас. Қолаверса, "Ал Насср" ҳам кучли жамоа ҳисобланади, ахир бу клубда Абдераззақ Ҳамдаллаҳ сингари тўпурар бежизга ўйнаётгани йўқ.

Айтайлик, бу трансфер амалга ошмагани билан Машарипов Европага кетса, бундан яхшиси йўқ. Лекин яна Ўзбекистон чемпионатига қайтса, бу ортга қадам ташлаш бўлади. Узун қулоқ гап-сўзларга қараганда моҳир ярим ҳимоячи Қатарнинг "Ал Садд" клуби билан шартнома имзолар эмиш. Лекин бу қанчалик ҳақиқат, албатта вақт ўтиб билиб оламиз.

Машарипов ҳақида берилган сўровнома якунлари