Кеча турнирнинг гуруҳ босқичига қуръа ташланди. Эрон, Индонезия, Яман билан бир квартетдан ўрин олган вакилларимиз эндиликда тайёргарликка янад кучлироқ урғу беришади. Бу борада терма жамоа сардори Муҳаммадали Ўринбоев фикрларини билдирди.

"Бундай катта турнирларга барча жамоани ҳурмат қилган ҳолда тайёрланиш керак деб ўйлайман. Мақсадимиз фақат гуруҳдан чиқиб тўхтаб қолиш эмас, балки Жаҳон чемпионатига йўлланма олиш ва бош совринга эга чиқиш. Йўлимизда ким рақиб бўлишидан қатъий назар ўз мақсадимизга эришишимиз шарт. Бошқа натижа бизни қониқтирмайди. Икки карра Осиё чемпиони бўлиб янги тарих ёзишни истаймиз.

Ҳозир ҳаёлни фақат Эронга қаратиб қўйиш тўғри бўлмайди. Биз бу жамоани ҳаттоки биздан 1-2 ёш катта жамоасини ютганмиз. Бизни турнирда яхши ўйинлар кутмоқда.

Клубдаги фаолиятимга келсак, биласиз кўп вақтимиз терма жамоа ихтиёрида бўлмоқда. Шу боис клубда ўйин амалиётига эга бўлмаётгандим. Охирги турларда эса ишонч билдиришмоқда. Буни оқлашга ҳаракат қиламан ва ўз устимда ишлашдан тўхтамайман",- дейди Муҳаммадали Ўринбоев.

Абдулазиз Искандаров суҳбатлашди

Муҳаммадали Ўринбоев: "Эронни CAFA турнирида ютганмиз, Осиё кубогида чемпионликдан бошқаси қониқтирмайди"